سیدنا ابوہریرہ رضی اللہ عنہ سے روایت ہے کہ لوگوں نے سیدنا عمر رضی اللہ عنہ کی جانب خط لکھا جس میں ان سے نماز جمعہ کے بارے میں دریافت کیا گیا تھا، تو انہوں نے جواباً لکھا: «جَمِّعُوا حَيْثُمَا كُنْتُمْ» ”تم جہاں کہیں بھی ہو جمعہ (کی نماز) قائم کرو۔“ [مصنف ابن ابي شيبه/كتاب الجمعة/حدیث: 5170]

جعفر بن برقان سے روایت ہے کہ عمر بن عبدالعزیز رحمہ اللہ نے عدی بن عدی کی طرف لکھا: ”جس بستی کے باشندے خیموں والے (خانہ بدوش) نہ ہوں کہ وہ ایک جگہ سے دوسری جگہ منتقل ہوتے رہیں، تو آپ ان پر ایک امیر مقرر کر دیں جو انہیں نمازِ جمعہ پڑھایا کرے۔“ [مصنف ابن ابي شيبه/كتاب الجمعة/حدیث: 5171]

عطاء سے روایت ہے، انہوں نے کہا: ”اگر بستیاں ایک دوسرے کے ساتھ باہم متصل ہوں تو وہاں کے لوگ نمازِ جمعہ قائم کریں۔“ [مصنف ابن ابي شيبه/كتاب الجمعة/حدیث: 5172]

امام مالک رحمہ اللہ سے روایت ہے، انہوں نے کہا: ”محمد صلی اللہ علیہ وسلم کے صحابہ مکہ اور مدینہ کے درمیان ان آبی مقامات (پانی کے چشموں) پر «يُجَمِّعُونَ» یعنی جمعہ کی نماز ادا کیا کرتے تھے۔“ [مصنف ابن ابي شيبه/كتاب الجمعة/حدیث: 5173]