حضرت ابو الاحوص سے مروی ہے کہ حضرت عبد اللہ نے ارشاد فرمایا: جو شخص زکوٰۃ ادا نہ کرے اسکی نماز قبول نہیں ہے۔ [مصنف ابن ابي شيبه/كتاب الزكاة/حدیث: 10088]

حضرت سلمہ سے مروی ہے کہ حضرت ضحاک فرماتے ہیں کہ نماز قبول نہیں مگر زکوٰۃ ادا کرنے کے ساتھ۔ [مصنف ابن ابي شيبه/كتاب الزكاة/حدیث: 10089]

حضرت ابو الاحوص سے مروی ہے کہ حضرت عبد اللہ نے ارشاد فرمایا: مؤمن زکوٰۃ ادا کرنے کو ترک نہیں کرتا۔ [مصنف ابن ابي شيبه/كتاب الزكاة/حدیث: 10090]

حضرت ابراہیم سے مروی ہے کہ حضرت ابوبکر صدیق نے ارشاد فرمایا: اگر وہ لوگ مجھے رسی کا ایک ٹکڑا ادا کرنے سے بھی انکار کریں جو وہ حضور صلی اللہ علیہ وآلہ وسلم کو دیا کرتے تھے میں ان سے ضرور جہاد کروں گا، پھر آپ نے یہ آیت مبارکہ تلاوت فرمائی: محمد (صلی اللہ علیہ وآلہ وسلم) نہیں ہیں مگر رسول، تحقیق ان سے پہلے بھی رسول گذر چکے، کیا اگر یہ مرجائیں یا قتل کردیئے جائیں تم اپنی ایڑیوں کے بل واپس پلٹ جاؤ گے“۔ [مصنف ابن ابي شيبه/كتاب الزكاة/حدیث: 10091]

حضرت ابو زبیر سے مروی ہے کہ حضرت جابر نے ارشاد فرمایا: جب تو نے اپنے مال کی زکوٰۃ ادا کردی تو تجھ سے اس کا شر دور ہوگیا۔ [مصنف ابن ابي شيبه/كتاب الزكاة/حدیث: 10092]

حضرت معاذ بن جبل سے مروی ہے کہ جب حضور صلی اللہ علیہ وآلہ وسلم نے مجھے (یمن) کی طرف بھیجا تو مجھ سے فرمایا: بیشک تیرے پاس اہل کتاب کے لوگ آئیں گے تو تم ان کو لا الہ الا اللہ کی شہادت اور میری رسالت کی دعوت دینا، اگر وہ اسکو قبول کرلیں تو ان کو بتانا کہ اللہ تعالیٰ نے ان پر دن رات میں پانچ نمازیں فرض کی ہیں، اگر وہ اسکو قبول کرلیں تو ان کو بتانا کہ اللہ تعالیٰ نے ان کے اموال میں ان پر زکوٰۃ فرض کی ہے، ان کے مال داروں سے لینا اور ان کے فقراء پر خرچ کرنا، اگر وہ اسکو قبول کرلیں تو پس تو بچنا ان کے عمدہ اور قیمتی مال سے، اور مظلوم کی بددعا سے اپنے آپکو بچانا کہ اس کے اور اللہ تعالیٰ کے درمیان حجاب نہیں ہوتا۔ [مصنف ابن ابي شيبه/كتاب الزكاة/حدیث: 10093]

حضرت حارث سے مروی ہے کہ حضرت علی رضی اللہ عنہ کرم اللہ وجہہ نے ارشاد فرمایا: زکوٰۃ ادا نہ کرنے والے پر اللہ کی لعنت ہے۔ [مصنف ابن ابي شيبه/كتاب الزكاة/حدیث: 10094]

حضرت حارث نے حضرت علی رضی اللہ عنہ کرم اللہ وجہہ سے اسی طرح کا قول نقل کیا ہے۔ [مصنف ابن ابي شيبه/كتاب الزكاة/حدیث: 10095]

حضرت حارث بن عبد اللہ حضرت عبد اللہ بن مسعود رضی اللہ عنہ سے نقل فرماتے ہیں کہ زکوٰۃ ادا نہ کرنے والے قیامت کے دن ملعون ہوں گے محمد (صلی اللہ علیہ وآلہ وسلم) کی زبان پر۔ [مصنف ابن ابي شيبه/كتاب الزكاة/حدیث: 10096]

حضرت مثنی بن سعید فرماتے ہیں کہ میں نے سنا حضرت انس سے کہ دیہاتیوں کی ایک قوم نے زکوٰۃ کے بارے میں شک کیا تو حضرت انس نے فرمایا تم زکوٰۃ کو اکٹھا کرو اور اس کے وقت میں ادا کرو پس جو کچھ وقت کے بعد تم سے لیا گیا وہ ظلم ہے جو تم پر کیا گیا اس میں جو تم نے سپرد کیا۔ [مصنف ابن ابي شيبه/كتاب الزكاة/حدیث: 10097]