حضرت ام سلمہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جب تم لوگ مریض یا میت کے پاس جاؤ تو اچھی بات کہو، کیونکہ جو تم کہتے ہو ملائکہ اس پر اٰمین کہتے ہیں۔ [مصنف ابن ابي شيبه/كتاب الجنائز/حدیث: 11158]

حضرت شعبی فرماتے ہیں کہ انصار (صحابہ کرام) میت کے پاس سورة البقرہ کی تلاوت فرمایا کرتے تھے۔ [مصنف ابن ابي شيبه/كتاب الجنائز/حدیث: 11159]

حضرت ام الحسن فرماتی ہیں کہ میں حضر ت ام سلمہ کے پاس موجود تھی اور ان کے سر کو دیکھ رہی تھی۔ ایک شخص نے آ کر کہا فلاں آدمی مرنے والا ہے۔ آپ نے مجھ سے فرمایا کہ اس کے پاس جاؤ، جب اس کا سانس اکھڑنے لگے تو یہ کہو: سلام ہو رسولوں پر اور تمام تعریفیں رب العالمین کے لئے ہیں۔ [مصنف ابن ابي شيبه/كتاب الجنائز/حدیث: 11160]

حضرت ابن عون سے مروی ہے کہ حضر ت محمد بن سیرین اپنے اھل میں سے کسی کی وفات پر حاضر ہوئے تو آپ نے فرمایا: لوگو! سلام کہو، لوگو! سلام کہو۔ [مصنف ابن ابي شيبه/كتاب الجنائز/حدیث: 11161]

حضرت ابو سعید سے مروی ہے کہ رسول اللہ صلی اللہ علیہ وآلہ وسلم نے ارشاد فرمایا: جب تم مریض کے پاس جاؤ تو اس کو موت کے بارے میں تسلی دو، بیشک یہ بات کوئی چیز رد نہیں کرتی لیکن مریض خوش کرتی ہے۔ [مصنف ابن ابي شيبه/كتاب الجنائز/حدیث: 11162]

حضرت امیہ ازدی سے مروی ہے کہ حضرت جابر بن زید میت کے پاس سورة الرعد کی تلاوت فرماتے۔ [مصنف ابن ابي شيبه/كتاب الجنائز/حدیث: 11163]

حضرت معقل بن یسار سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: اپنے مردوں کے پاس سورة یٰسٓ پڑھو۔ [مصنف ابن ابي شيبه/كتاب الجنائز/حدیث: 11164]