حضرت ہشام، حضرت عطاء کے بارے میں روایت کرتے ہیں کہ وہ گندگی کھانے والے جانوروں کے گوشت اور ان کے دودھ کو مکروہ سمجھتے تھے۔ [مصنف ابن ابي شيبه/كتاب الأطعمة/حدیث: 26199]

حضرت مجاہد سے روایت ہے کہ جناب نبی کریم صلی اللہ علیہ وآلہ وسلم نے گندگی کھانے والے جانوروں کے گوشت اور ان کے دودھ سے منع فرمایا۔ [مصنف ابن ابي شيبه/كتاب الأطعمة/حدیث: 26200]

حضرت جابر سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے اس بات سے منع کیا کہ گندگی کھانے والے جانور کا گوشت کھایا جائے یا اس کا دودھ پیا جائے۔ [مصنف ابن ابي شيبه/كتاب الأطعمة/حدیث: 26201]

حضرت ابن جریج سے روایت ہے۔ وہ کہتے ہیں کہ حضرت عطاء گندگی کھانے والے جانور کے بارے میں کوئی حرج نہیں محسوس کرتے تھے کہ اس پر حج کیا جائے اور جب اس کا اکثر چارہ غیر گندگی ہو تو اس کو کھایا جائے اور اگر اس کا اکثر چارہ گندگی ہو تو پھر آپ نے اس کو ناپسند فرمایا ہے۔ [مصنف ابن ابي شيبه/كتاب الأطعمة/حدیث: 26202]

حضر ت عمرو، حضرت حسن کے بارے میں روایت کرتے ہیں کہ وہ گندگی کھانے والے جانور کے کھانے میں کوئی حرج نہیں دیکھتے تھے۔ [مصنف ابن ابي شيبه/كتاب الأطعمة/حدیث: 26203]

حضرت عکرمہ بن خالد سے روایت ہے، وہ کہتے ہیں کہ گندگی کھانے والے جانور کے گوشت اور دودھ سے منع کیا گیا ہے اور اس بات سے بھی منع کیا گیا ہے کہ اس پر حج یا عمرہ کیا جائے۔ [مصنف ابن ابي شيبه/كتاب الأطعمة/حدیث: 26204]

حضرت نافع، حضرت ابن عمر رضی اللہ عنہما کے بارے میں روایت کرتے ہیں کہ وہ گندگی کھانے والی مرغی کو (ذبح سے پہلے) تین دن بند رکھتے تھے۔ [مصنف ابن ابي شيبه/كتاب الأطعمة/حدیث: 26205]

حضرت عکرمہ سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے گندگی کھانے والی بکری کے دودھ سے منع فرمایا ہے۔ [مصنف ابن ابي شيبه/كتاب الأطعمة/حدیث: 26206]

حضرت مجاہد سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے گندگی کھانے والی بکری کے گوشت سے منع فرمایا ہے۔ [مصنف ابن ابي شيبه/كتاب الأطعمة/حدیث: 26207]

حضرت مجاہد سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے گندگی خور جانور کے دودھ سے منع فرمایا۔ [مصنف ابن ابي شيبه/كتاب الأطعمة/حدیث: 26208]