حضرت قتادہ فرماتے ہیں کہ ایک یہودی نے رسول اللہ صلی اللہ علیہ وآلہ وسلم کے لیے اونٹنی کا دودھ دھویا۔ اس پر آپ صلی اللہ علیہ وآلہ وسلم نے اس کو یوں دعا دی: اے اللہ! تو اس کو خوبصورت بنا دے، پس اس کے بال سیاہ ہوگئے۔ [مصنف ابن ابي شيبه/ كتاب الأدب/حدیث: 27491]

حضرت منصور فرماتے ہیں کہ حضرت ابراہیم نے ار شاد فرمایا: اس میں کوئی حرج نہیں ہے کہ تم یہودی کو یوں کہو: ھداک اللہ۔ اللہ تمہیں ہدایت دے۔ [مصنف ابن ابي شيبه/ كتاب الأدب/حدیث: 27492]

حضرت ابراہیم فرماتے ہیں کہ ایک یہودی رسول اللہ صلی اللہ علیہ وآلہ وسلم کی خدمت میں آیا اور کہنے لگا۔ آپ صلی اللہ علیہ وآلہ وسلم اللہ سے میرے حق میں دعا فرما دیجئے۔ آپ صلی اللہ علیہ وآلہ وسلم نے فرمایا: اللہ تیرے حال اور تیری اولاد کو بڑھا دے اور تیرے جسم کو صحت مند کر دے اور تیری عمر کو لمبا کر دے۔ [مصنف ابن ابي شيبه/ كتاب الأدب/حدیث: 27493]

حضرت ابو سنان فرماتے ہیں کہ حضرت سعید بن جبیر نے ارشاد فرمایا: اگر فرعون بھی مجھے کہے: بارک اللّٰہ فیک: اللہ تجھ میں برکت دے تو میں بھی کہوں گا اور تجھ میں بھی۔ [مصنف ابن ابي شيبه/ كتاب الأدب/حدیث: 27494]