حضرت خیثمہ فرماتے ہیں کہ حضرت عیسیٰ کا گزر ایک عورت پر سے ہوا تو اس عورت نے کہا: خوشخبری ہے اس پیٹ کے لیے جس نے تیرا بوجھ اٹھایا اور خوش خبری ہے اس پستان کے لیے جس نے تجھے دودھ پلایا: راوی کہتے ہیں: حضرت عیسیٰ نے فرمایا: خوشخبری ہے اس شخص کے لیے جس نے قرآن کو پڑھا اور اس کی تعلیمات کی پیروی کی۔ [مصنف ابن ابي شيبه/كتاب فضائل القرآن/حدیث: 32010]

حضرت واصل فرماتے ہیں کہ حضرت ابراہیم نے ارشاد فرمایا: ایک عورت کا گزر حضرت عیسیٰ بن مریم کے پاس سے ہوا، پھر آگے راوی نے ما قبل جیسی حدیث ذکر فرمائی۔ [مصنف ابن ابي شيبه/كتاب فضائل القرآن/حدیث: 32011]

حضرت مغیرہ بنت حسان فرماتی ہیں کہ میں نے حضرت انس کو یوں فرماتے ہوئے سنا! یقینا اس نے تھام لیا ایک مضبوط سہارا، آپ نے فرمایا: مضبوط سہارے سے مراد قرآن ہے۔ [مصنف ابن ابي شيبه/كتاب فضائل القرآن/حدیث: 32012]

حضرت مرہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: جو شخص علم حاصل کرنا چاہتا ہے اسے چاہیے کہ وہ قرآن پڑھے کیونکہ اس میں پہلے اور بعد کے لوگوں کا علم ہے۔ [مصنف ابن ابي شيبه/كتاب فضائل القرآن/حدیث: 32013]

حضرت اسود فرماتے ہیں کہ حضرت عبد اللہ نے ارشاد فرمایا: دو شفا دینے والی چیزوں کو لازم پکڑ لو۔ قرآن اور شہد۔ [مصنف ابن ابي شيبه/كتاب فضائل القرآن/حدیث: 32014]

حضرت ابو الاحوص فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: شہد میں ہر بیماری کی شفا ہے، اور قرآن میں شفاء ہے سینوں میں پائے جانے والے وسوسوں کے لیے۔ [مصنف ابن ابي شيبه/كتاب فضائل القرآن/حدیث: 32015]

حضرت لیث فرماتے ہیں کہ حضرت مجاہد نے ارشاد فرمایا: آیت کا ترجمہ: لوگوں کے لیے شفاء ہے۔ فرمایا: قرآن میں شفا ہے۔ [مصنف ابن ابي شيبه/كتاب فضائل القرآن/حدیث: 32016]