طاؤس روایت کرتے ہیں کہ حضرت ابن عباس رضی اللہ عنہما نے فرمایا کہ میں حضرت عمر کے پاس لوگوں میں سب سے آخر میں موجود تھا، میں نے ان کو فرماتے ہوئے سنا کہ کلالہ وہ ہے جس کی اولاد نہ ہو۔ [مصنف ابن ابي شيبه/كتاب الفرائض/حدیث: 33756]

شعبی فرماتے ہیں کہ حضرت ابوبکر نے فرمایا کہ میری کلالہ کے بارے میں ایک رائے ہے، اگر وہ درست ہو تو اللہ کی جانب سے ہے، اور اگر خطاء ہو تو میری اور شیطان کی جانب سے، کلالہ وہ رشتہ دار ہیں جو اولاد اور والد کے علاوہ ہوں۔ [مصنف ابن ابي شيبه/كتاب الفرائض/حدیث: 33757]

حسن بن محمد فرماتے ہیں کہ حضرت ابن عباس رضی اللہ عنہما نے مجھ سے فرمایا کہ کلالہ وہ ہے جس کی نہ اولاد ہو نہ والد۔ [مصنف ابن ابي شيبه/كتاب الفرائض/حدیث: 33758]

ابو الخیر روایت کرتے ہیں کہ حضرت عقبہ بن عامر نے فرمایا کہ رسول اللہ صلی اللہ علیہ وسلم کو اتنا کسی اور چیز نے مشقت میں نہیں ڈالا جتنا ان کو کلالہ نے مشقت میں ڈالا۔ [مصنف ابن ابي شيبه/كتاب الفرائض/حدیث: 33759]

شعبہ فرماتے ہیں کہ میں نے حضرت حکم سے کلالہ کے بارے میں سوال کیا تو انہوں نے فرمایا کہ اولاد اور باپ کے علاوہ۔ [مصنف ابن ابي شيبه/كتاب الفرائض/حدیث: 33760]

قاسم روایت کرتے ہیں کہ سعد بن مالک نے اس طرح قراءت کی وَلَہُ أَخٌ، أَوْ أُخْتٌ لأم۔ [مصنف ابن ابي شيبه/كتاب الفرائض/حدیث: 33761]

سلیم بن عبد سلولی روایت کرتے ہیں کہ حضرت ابن عباس رضی اللہ عنہما نے فرمایا کہ کلالہ اولاد اور والد کے علاوہ رشتہ دار ہیں۔ [مصنف ابن ابي شيبه/كتاب الفرائض/حدیث: 33762]

سُمیط فرماتے ہیں کہ حضرت عمر فرماتے تھے کہ کلالہ اولاد اور والد کے علاوہ رشتہ دار ہیں۔ [مصنف ابن ابي شيبه/كتاب الفرائض/حدیث: 33763]

سفیان بن حسین ایک آدمی کے واسطے سے ابن عباس رضی اللہ عنہما سے روایت کرتے ہیں کہ کلالہ میت کو کہتے ہیں۔ [مصنف ابن ابي شيبه/كتاب الفرائض/حدیث: 33764]