حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے فرمایا کہ میری امت کی سب سے پہلی جماعت جو جنت میں داخل ہوگی ان کے چہرے چودہویں رات کے چاند کی طرح ہوں گے۔ پھر جو لوگ ان کے بعد داخل ہوں گے ان کے چہرے ستاروں کی طرح چمک رہے ہوں گے۔ [مصنف ابن ابي شيبه/كتاب الأوائل/حدیث: 38737]

حضرت فاطمہ سے روایت ہے کہ رسول اللہ صلی اللہ علیہ وآلہ وسلم نے مجھ سے فرمایا تم سب سے پہلے مجھ سے آملو گی اور میں تمہارے لئے بہترین سلف ہوں۔ [مصنف ابن ابي شيبه/كتاب الأوائل/حدیث: 38738]

حضرت عائشہ رضی اللہ عنہا فرماتی ہیں کہ اللہ تعالیٰ نے سب سے پہلے نماز میں دو رکعتیں فرض فرمائیں۔ پھر مقیم کے لئے چار رکعتیں ہوگئیں اور سفر کی نماز پہلے فریضے کے مطابق ہی رکھی گئی۔ [مصنف ابن ابي شيبه/كتاب الأوائل/حدیث: 38739]

حضرت اوزاعی فرماتے ہیں کہ میں نے حضرت زہری سے لڑکوں کی گواہی کے بارے میں سوال کیا تو انہوں نے فرمایا کہ سب سے پہلے لڑکوں کی گواہی پر مروان نے فیصلہ کیا۔ [مصنف ابن ابي شيبه/كتاب الأوائل/حدیث: 38740]

حضرت حسن سے روایت ہے کہ رسول اللہ صلی اللہ علیہ وآلہ وسلم نے فرمایا کہ ولیمہ پہلے دن حق ہے، دوسرے دن نیکی ہے اور تیسرے دن ریاء ہے۔ [مصنف ابن ابي شيبه/كتاب الأوائل/حدیث: 38741]

حضرت محمد فرماتے ہیں کہ عید الفطر اور عید الاضحی میں اذان بنو مروان نے شروع کی۔ [مصنف ابن ابي شيبه/كتاب الأوائل/حدیث: 38742]

حضرت طاوس فرماتے ہیں کہ فجر کی اذان میں تثویب حضرت بلال نے حضرت ابوبکر کے دور میں شروع کی۔ وہ حی علی الفلاح کہنے کے بعد دو مرتبہ الصَّلاَۃُ خَیْرٌ مِنَ النَّوْمِ کہا کرتے تھے۔ [مصنف ابن ابي شيبه/كتاب الأوائل/حدیث: 38743]

حضرت ابوہریرہ سے [مصنف ابن ابي شيبه/كتاب الأوائل/حدیث: 38744]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ میری امت میں سب سے پہلے جو جماعت جنت میں داخل ہوگی ان کے چہرے چودھویں کے چاند کی طرح چمک رہے ہوں گے۔ پھر ان کے بعد جو لوگ ہوں گے ان کے چہرے آسمان کے ستاروں کی طرح چمک رہے ہوں گے۔ [مصنف ابن ابي شيبه/كتاب الأوائل/حدیث: 38745]

حضرت ابوجعفر اس بات کو مستحب قرار دیتے تھے کہ پہلے طواف قدوم کے بعد پڑھی جانے والی رکعتوں میں سورة الکافرون اور سورة الاخلاص کی تلاوت کریں۔ [مصنف ابن ابي شيبه/كتاب الأوائل/حدیث: 38746]