سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: ہم نے نبی کریم صلی اللہ علیہ وسلم کے ہمراہ (یعنی آپ کے زمانہ میں) تیمم کیا ہے۔ اس میں دو ضربیں ہوتی ہیں۔ ایک ضرب چہرہ مبارک کے لیے اور دونوں ہتھیلیوں کے لیے ہوتی تھی، جبکہ ایک ضرب دونوں بازوؤں کے لیے کہنیوں تک ہوتی تھی۔ اس روایت کے دو راوی سلیمان بن ارقم، سلیمان بن ابوداؤد ضعیف ہیں۔ [سنن الدارقطني/كِتَابُ الطَّهَارَةِ/حدیث: 689]

سیدنا عبداللہ بن عمر رضی اللہ عنہما نبی کریم صلی اللہ علیہ وسلم سے تیمم کے بارے میں یہ بات نقل کرتے ہیں: ”اس میں دو ضربیں ہوں گی۔ ایک ضرب چہرے کے لیے ہو گی، دوسری ضرب کہنیوں تک ہاتھوں کے لیے ہو گی۔“ [سنن الدارقطني/كِتَابُ الطَّهَارَةِ/حدیث: 690]

سیدنا جابر رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”تیمم میں ایک ضرب چہرے کے لیے ہو گی، ایک ضرب کلائی سے کہنیوں تک کے لیے ہو گی۔“ اس کے تمام راوی ثقات ہیں تاہم درست یہ ہے کہ یہ روایت موقوف ہے۔ [سنن الدارقطني/كِتَابُ الطَّهَارَةِ/حدیث: 691]

سیدنا جابر رضی اللہ عنہ کے بارے میں یہ بات منقول ہے: ایک شخص آیا اور بولا: ”مجھے جنابت لاحق ہو گئی ہے، میں مٹی میں لوٹ پوٹ ہو گیا۔“ تو انہوں نے فرمایا: ”تم (ہاتھ) زمین پر مارو۔“ تو اس نے اپنا ہاتھ زمین پر مار کر دونوں ہاتھوں کے ذریعے چہرے کا مسح کیا پھر اس نے دوسرا ہاتھ زمین پر مارا اور اس کے ساتھ ہاتھوں سے کہنیوں تک کا مسح کیا۔ [سنن الدارقطني/كِتَابُ الطَّهَارَةِ/حدیث: 692]

ابان نامی راوی بیان کرتے ہیں: قتادہ سے سفر کے دوران تیمم کے بارے میں پوچھا گیا تو انہوں نے جواب دیا، سیدنا عبداللہ بن عمر رضی اللہ عنہما یہ بیان کرتے تھے کہ کہنیوں تک کیا جائے گا۔ حسن بصری اور ابراہیم نخعی فرماتے ہیں: کہنیوں تک (مسح کیا جائے گا)۔ سیدنا عمار بن یاسر رضی اللہ عنہ نے یہ بات بیان کی ہے: نبی کریم صلی اللہ علیہ وسلم نے ارشاد فرمایا ہے: ”کہنیوں تک (تیمم) کیا جائے گا۔“ ابواسحاق نامی راوی بیان کرتے ہیں: میں نے اس روایت کا تذکرہ امام احمد بن حنبل رحمہ اللہ سے کیا تو انہیں یہ روایت بہت پسند آئی۔ انہوں نے فرمایا: ”یہ کتنی بہترین روایت ہے۔“ [سنن الدارقطني/كِتَابُ الطَّهَارَةِ/حدیث: 693]

سالم، سیدنا عبداللہ بن عمر رضی اللہ عنہما کے بارے میں یہ بات نقل کرتے ہیں: جب وہ تیمم کرتے تھے تو دونوں ہاتھوں کو زمین پر مارتے تھے۔ ان کے ذریعے ہاتھوں سے دونوں کہنیوں تک مسح کیا کرتے تھے۔ وہ اپنے ہاتھوں سے مٹی نہیں جھاڑتے تھے۔ [سنن الدارقطني/كِتَابُ الطَّهَارَةِ/حدیث: 694]

سیدنا علی رضی اللہ عنہ فرماتے تھے: ”(تیمم میں) دو ضربیں ہوں گی۔ ایک ضرب چہرے کے لیے ہو گی، ایک ضرب دونوں بازوؤں کے لیے ہو گی۔“ [سنن الدارقطني/كِتَابُ الطَّهَارَةِ/حدیث: 695]

سیدنا عمار بن یاسر رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں چہرے اور دونوں بازوؤں کا تیمم کرنے کی ہدایت کی تھی۔ [سنن الدارقطني/كِتَابُ الطَّهَارَةِ/حدیث: 696]

سیدنا عمار رضی اللہ عنہ بیان کرتے ہیں: نبی کریم صلی اللہ علیہ وسلم فرماتے ہیں: ”تیمم چہرے اور دونوں بازوؤں کے لیے ضرب لگانے (یعنی ان پر مسح کرنے) کا نام ہے۔“ [سنن الدارقطني/كِتَابُ الطَّهَارَةِ/حدیث: 697]

سیدنا جابر رضی اللہ عنہ کے بارے میں یہ بات منقول ہے: ایک شخص آیا اور بولا: ”مجھے جنابت لاحق ہو گئی ہے اور میں مٹی میں لوٹ پوٹ ہو گیا۔“ تو انہوں نے فرمایا: ”تم زمین پر ہاتھ مارو۔“ اس نے اپنا ہاتھ زمین پر مارا اور پھر اس کے ذریعے چہرے کا مسح کیا اور پھر دوبارہ اپنا ہاتھ زمین پر مارا پھر ان دونوں ہاتھوں کے ذریعے کہنیوں تک دونوں بازوؤں کا مسح کیا۔ [سنن الدارقطني/كِتَابُ الطَّهَارَةِ/حدیث: 698]