سیدنا رافع بن سنان رضی اللہ عنہ کے بارے میں منقول ہے: انہوں نے اسلام قبول کر لیا، ان کی بیوی نے اسلام قبول کرنے سے انکار کر دیا، ان دونوں کی ایک بیٹی تھی، جس کا نام عمیرہ تھا، اس عورت نے اس بچی کا مطالبہ کیا، تو سیدنا رافع رضی اللہ عنہ نے انکار کر دیا، وہ دونوں نبی کریم صلی اللہ علیہ وسلم کی خدمت میں حاضر ہوئے، نبی کریم صلی اللہ علیہ وسلم نے اس خاتون سے فرمایا: ”تم یہاں بیٹھ جاؤ۔“ آپ نے سیدنا رافع سے فرمایا: ”تم یہاں بیٹھ جاؤ۔“ پھر آپ نے فرمایا: ”اب تم دونوں اس بچی کو بلاؤ۔“ ان دونوں نے بلایا، وہ بچی اپنی والدہ کی طرف مائل ہونے لگی، تو نبی کریم صلی اللہ علیہ وسلم نے دعا کی: ”اے اللہ! اسے ہدایت عطا کر۔“ تو وہ بچی اپنے والد کی طرف مائل ہو گئی، تو انہوں نے اسے حاصل کر لیا، اور اپنے ساتھ لے گئے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4018]

طاؤس بیان کرتے ہیں: ابوصہباء سیدنا ابن عباس رضی اللہ عنہما کے پاس آیا، تو سیدنا ابن عباس رضی اللہ عنہما نے اس سے فرمایا: ”اپنا موقف (یا سوال) اور جو کچھ تمہارے ذہن میں ہے اور جو کچھ تم نے اکٹھا کیا ہے، اسے پیش کرو۔“ تو ابوصہباء نے ان سے کہا: ”کیا آپ جانتے ہیں؟ نبی کریم صلی اللہ علیہ وسلم کے زمانہ اقدس میں تین طلاقیں ایک شمار ہوتی تھیں۔“ تو سیدنا عبداللہ بن عباس رضی اللہ عنہما نے جواب دیا: ”جی ہاں، نبی کریم صلی اللہ علیہ وسلم کے زمانہ، سیدنا ابوبکر رضی اللہ عنہ کے عہد خلافت اور سیدنا عمر رضی اللہ عنہ کے عہد خلافت کے ابتدائی دور میں تین طلاقیں ایک ہی شمار ہوتی تھیں، لیکن جب سیدنا عمر رضی اللہ عنہ کے عہد میں طلاق کے مقدمات زیادہ آنے لگے، تو سیدنا عمر بن خطاب رضی اللہ عنہ نے انہیں تین قرار دینا (شروع کر دیا)۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4019]

سیدنا معاذ بن جبل رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”اے معاذ! جو شخص بدعت (یعنی خلاف سنت) طریقے سے اپنی بیوی کو ایک، دو، یا تین طلاقیں دے گا، ہم اس کی بدعت کو اس پر لازم کر دیں گے۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4020]

سیدنا معاذ بن جبل رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”اے معاذ! جو شخص بدعت طریقے سے اپنی بیوی کو ایک، دو یا تین طلاقیں دے گا، ہم اس کی بدعت کو اس پر لازم کر دیں گے۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4021]

سیدنا عبداللہ بن عمر رضی اللہ عنہما سے بیان کرتے ہیں: ”جو شخص اپنی بیوی کو اس کے حیض کے دوران تین طلاقیں دے دے، تو وہ عورت اس سے بائنہ ہو جائے گی، تاہم اس شخص نے اپنے پروردگار کی نافرمانی کی اور سنت کی خلاف ورزی کی۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4022]

یہی روایت ایک اور سند کے ہمراہ منقول ہے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4023]

ابان بن تغلب بیان کرتے ہیں: میں نے امام جعفر صادق سے ایسے شخص کے بارے میں دریافت کیا، جو اپنی بیوی کو تین طلاقیں دے دیتا ہے، امام جعفر صادق نے فرمایا: ”وہ عورت اس شخص سے بائنہ ہو جائے گی اور اس کے لیے اس وقت تک حلال نہیں ہو گی، جب تک دوسری شادی کر کے (بیوہ یا مطلقہ) نہیں ہو جاتی۔“ میں نے ان سے دریافت کیا: ”کیا میں لوگوں کو اس کے مطابق فتوی دے دوں؟“ تو انہوں نے جواب دیا: ”جی ہاں۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4024]

سیدنا عبداللہ بن عباس رضی اللہ عنہما بیان کرتے ہیں: ”نبی کریم صلی اللہ علیہ وسلم نے خلع کو ایک بائنہ طلاق قرار دیا تھا۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4025]

سیدنا عبداللہ بن عباس رضی اللہ عنہما بیان کرتے ہیں: سیدنا ثابت بن قیس رضی اللہ عنہ کی اہلیہ نے ان سے خلع لے لیا تھا، تو نبی کریم صلی اللہ علیہ وسلم نے اس خاتون کو یہ ہدایت کی کہ وہ ایک حیض عدت گزارے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4026]

عکرمہ بیان کرتے ہیں: ثابت کی اہلیہ (اس کے بعد حسب سابق حدیث ہے)، انہوں نے (اس کی سند میں) سیدنا ابن عباس رضی اللہ عنہما کا ذکر کیا ہے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4027]