یہی روایت ایک اور سند کے ہمراہ بھی منقول ہے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4038]

سہیل بن ابوصالح اپنے والد کا یہ بیان نقل کرتے ہیں: ”میں نے 12 صحابہ کرام سے ایسے شخص کے بارے میں دریافت کیا، جو ایلاء کر لیتا ہے، تو ان حضرات نے یہی جواب دیا: اس پر اس وقت تک کوئی چیز عائد نہیں ہو گی، جب تک چار ماہ نہیں گزر جاتے، پھر (مرد کی مرضی) پر موقوف ہو گا، اگر وہ رجوع کر لے تو (ٹھیک)، ورنہ طلاق دے دے۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4039]

سلیمان بن یسار بیان کرتے ہیں: ”میں نے دس صحابہ کرام رضی اللہ عنہم کو پایا، وہ سب ایلاء کرنے والے کی مرضی پر موقوف قرار دیتے ہیں۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4040]

طاؤس روایت کرتے ہیں کہ سیدنا عثمان رضی اللہ عنہ ایلاء کرنے والے سے پوچھ گچھ کیا کرتے تھے۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4041]

سیدنا عثمان بن عفان رضی اللہ عنہ، ایلاء میں کوئی چیز نہیں سمجھتے تھے (یعنی طلاق نہیں ہوتی)، خواہ چار ماہ گزر جائیں (طلاق کا معاملہ مرد کی مرضی پر) موقوف ہو گا۔ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4042]

سیدنا زید بن ثابت رضی اللہ عنہ اور سیدنا عثمان غنی رضی اللہ عنہ فرماتے ہیں: ”جب چار ماہ گزر جائیں، تو یہ ایک طلاق شمار ہو گی۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4043]

سیدنا عثمان غنی رضی اللہ عنہ اور سیدنا زید بن ثابت رضی اللہ عنہ فرماتے ہیں: ”جب چار ماہ گزر جائیں، یہ ایک طلاق شمار ہو گی۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4044]

میمونی بیان کرتے ہیں: میں نے امام احمد بن حنبل کے سامنے عطاء خراسانی کی ابوسلمہ کے حوالے سے، سیدنا عثمان رضی اللہ عنہ سے نقل کردہ روایت کا ذکر کیا، تو انہوں نے فرمایا: ”مجھے معلوم نہیں یہ کیا ہے؟ سیدنا عثمان رضی اللہ عنہ کے حوالے سے اس کے برخلاف نقل کیا گیا ہے۔“ ان سے دریافت کیا گیا: ”کس نے اسے نقل کیا ہے؟“ انہوں نے جواب دیا: ”ابوعبداللہ یا حبیب بن ابوثابت نے طاؤس کے حوالے سے سیدنا عثمان رضی اللہ عنہ کی یہ رائے نقل کی ہے: ایلاء کرنے والے کی مرضی پر موقوف ہو گا۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4045]

سیدنا عمر بن خطاب رضی اللہ عنہ فرماتے ہیں: ”(ایلاء میں) جب چار ماہ گزر جائیں، تو یہ ایک طلاق شمار ہو گی اور جب تک عورت کی عدت پوری نہیں ہوتی، مرد کو اس سے رجوع کرنے کا اختیار ہو گا۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4046]

ایوب بیان کرتے ہیں: میں نے سعید بن جبیر سے دریافت کیا: کیا سیدنا عبداللہ بن عباس رضی اللہ عنہما یہ فرماتے تھے: ”جب چار ماہ گزر جائیں، تو یہ ایک بائنہ طلاق شمار ہو گی اور عورت پر عدت لازم نہیں ہو گی، اگر وہ چاہے تو (فوراً بعد دوسری) شادی کر سکتی ہے۔“ تو سعید نے جواب دیا: ”جی ہاں۔“ [سنن الدارقطني/ كِتَابُ الطَّلَاقِ وَالْخُلْعِ وَالْإِيلَاءِ وَغَيْرِهِِِ/حدیث: 4047]