سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ان سے ان کے عمرہ کے بارے میں فرمایا: ”بلاشبہ تمہارے لیے تمہاری مشقت اور تمہارے خرچ کے مطابق اجر ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا! اور اس کا ایک صحیح شاہد بھی موجود ہے: [المستدرك على الصحيحين/أَوَّلُ كِتَابِ الْمَنَاسِكِ/حدیث: 1751]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ان سے ان کے عمرہ کے متعلق فرمایا: ”تمہارے عمرہ کا اجر تمہارے خرچ کے مطابق ہے۔“ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1752]

سیدنا علی اور سیدنا عثمان رضی اللہ عنہما سے روایت ہے کہ دورانِ سفر سیدنا عثمان رضی اللہ عنہ نے حجِ تمتع (عمرہ کو حج کے ساتھ ملانے) سے منع فرمایا، تو سیدنا علی رضی اللہ عنہ سے کہا گیا کہ انہوں نے تمتع سے منع کیا ہے، تو علی رضی اللہ عنہ نے (اپنے ساتھیوں سے) فرمایا: جب تم انہیں دیکھو کہ وہ کوچ کر گئے ہیں تو تم بھی کوچ کر جاؤ، چنانچہ سیدنا علی رضی اللہ عنہ اور ان کے ساتھیوں نے عمرہ کا تلبیہ پکارا اور عثمان رضی اللہ عنہ نے انہیں نہیں روکا، پھر علی رضی اللہ عنہ نے فرمایا: کیا مجھے یہ خبر نہیں دی گئی کہ آپ تمتع سے منع کرتے ہیں؟ انہوں نے کہا: ہاں، تو علی رضی اللہ عنہ نے فرمایا: کیا آپ نے نہیں سنا کہ رسول اللہ صلی اللہ علیہ وسلم نے تمتع فرمایا تھا؟ انہوں نے کہا: جی ہاں۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1753]