سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم جب اپنے گھر سے باہر نکلتے تو یہ دعا فرماتے: «بِاسْمِ اللهِ، رَبِّ أَعُوذُ بِكَ أَنْ أَزِلَّ أَوْ أَضِلَّ، أَوْ أَظْلِمَ أَوْ أُظْلَمَ، أَوْ أَجْهَلَ أَوْ يُجْهَلَ عَلَيَّ» ”اللہ کے نام کے ساتھ (نکلتا ہوں)، اے میرے رب! میں تیری پناہ مانگتا ہوں اس سے کہ میں پھسل جاؤں یا بھٹک جاؤں، یا میں (کسی پر) ظلم کروں یا مجھ پر ظلم کیا جائے، یا میں نادانی کروں یا میرے ساتھ نادانی کی جائے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اور اگر کسی کو یہ وہم ہو کہ امام شعبی نے سیدہ ام سلمہ سے نہیں سنا تو یہ درست نہیں کیونکہ وہ سیدہ عائشہ اور سیدہ ام سلمہ دونوں کی خدمت میں حاضر ہوئے اور ان دونوں سے کثرت سے روایت کی ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1928]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم جب اپنے گھر سے باہر تشریف لے جاتے تو یہ فرماتے: «بِاسْمِ اللهِ، لَا حَوْلَ وَلَا قُوَّةَ إِلَّا بِاللهِ، التُّكْلَانُ عَلَى اللهِ» ”اللہ کے نام کے ساتھ، گناہوں سے بچنے کی ہمت اور نیکی کرنے کی طاقت اللہ ہی کی طرف سے ہے، اور اللہ ہی پر میرا بھروسہ ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1929]