سیدنا ابن عباس رضی اللہ عنہما فرماتے ہیں: جب نبی اکرم صلی اللہ علیہ وسلم کو مکہ سے نکالا گیا تو سیدنا ابوبکر رضی اللہ عنہ بولے: انہوں نے اپنے نبی کو نکال دیا، (اِنَّا لِلَّہِ وَاِنَّا اِلَیْہِ رَاجِعُوْن) یہ ضرور ہلاک ہوں گے، تو اللہ تعالیٰ نے یہ آیت نازل فرمائی: (اُذِنَ لِلَّذِیْنَ یُقَاتَلُوْنَ بِاَنَّھُمْ ظُلِمُوْا وَ اِنَّ اللّٰہَ عَلٰی نَصْرِھِمْ لَقَدِیْرُ) (الحج: 39) جہاد کے متعلق نازل ہونے والی یہ سب سے پہلی آیت ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ اس کو ابوحذیفہ رحمۃ اللہ علیہ کے علاوہ بھی کئی راویوں نے روایت کیا ہے۔ [المستدرك على الصحيحين/كِتَابُ التَّفْسِيرِ/حدیث: 3005]

سیدنا عبید بن عمر رضی اللہ عنہما اللیثی کہتے ہیں: میں نے عائشہ رضی اللہ عنہا سے کہا: اے ام المومنین رضی اللہ عنہا! رسول اللہ صلی اللہ علیہ وسلم یہ آیت کیسے پڑھا کرتے تھے؟ ” (وَالَّذِیْنَ یُؤْتُونَ مَااٰتَوْا) انہوں نے جواباً کہا: میں اس بات کی گواہی دیتی ہوں کہ میں نے رسول اللہ صلی اللہ علیہ وسلم کو (یُؤْتُون) پڑھتے سنا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3006]

سیدنا ابن عباس رضی اللہ عنہما فرماتے ہیں: رسول اللہ صلی اللہ علیہ وسلم (سورۃ مومنون کی آیت 67 کی یوں) تلاوت کیا کرتے تھے: (مُسْتَکْبِرِیْنَ بِہِ سَامِرًا تَھْجُرُوْنَ) (المؤمنون: 68) (ابن عباس) کہتے ہیں: مشرکین، رسول اللہ صلی اللہ علیہ وسلم کے ساتھ قطع تعلق کیا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3007]

سیدنا ابوسعید رضی اللہ عنہ سے روایت ہے کہ رسول اللہ صلی اللہ علیہ وسلم نے (وَھُمْ فِیْھَا کَالِحُونَ) (المومنون: 104) “ (کے متعلق) فرمایا: آگ اس کو ایسے جلائے گی کہ اس کا اوپر والا ہونٹ سکڑ کر سر کے درمیان میں پہنچ جائے گا اور نیچے کا ہونٹ اتنا ڈھلک جائے گا کہ اس کی ناف تک پہنچ جائے گا۔ ٭٭ یہ حدیث مصریین کی سند کے ہمراہ صحیح ہے لیکن شیخین رحمۃ اللہ علیہما نے اس کو نقل نہیں کیا۔ ابوالعباس محمد بن یعقوب کہتے ہیں: عباس بن محمد الدوری نے یحیی بن معین نے درج ذیل ابوالھیثم کے واسطے سے ابوسعید سے روایت کردہ احادیث کے متعلق پوچھا: تو انہوں نے جواباً کہا: یہ اسناد صحیح ہے۔ [المستدرك على الصحيحين/كِتَابُ التَّفْسِيرِ/حدیث: 3008]

عباس بن محمد دوری بیان کرتے ہیں کہ میں نے یحییٰ بن معین سے دراج کی ان احادیث کے بارے میں پوچھا جو وہ ابوالہیثم کے واسطے سے سیدنا ابو سعید (خدری رضی اللہ عنہ) سے روایت کرتے ہیں، تو انہوں نے فرمایا: ”یہ سند صحیح ہے“۔ [المستدرك على الصحيحين/كِتَابُ التَّفْسِيرِ/حدیث: 3008M]

سیدنا عبدالرحمن بن غنم رضی اللہ عنہ کہتے ہیں: میں نے معاذ رضی اللہ عنہ سے اللہ تعالیٰ کے قول: (مَا کَان ِیَنْبَغِیْ لَنَا اَنْ نَتَّخِذَ اَوْ نَتَّخِدَ) (الفرقان: 18) کے متعلق پوچھا تو آپ رضی اللہ عنہ نے فرمایا: میں نے نبی اکرم صلی اللہ علیہ وسلم کو (اَنْ نَتَّخِذَ مِنْ دُونَکَ) نون کے نصب کے ساتھ پڑھتے سنا ہے۔ [المستدرك على الصحيحين/كِتَابُ التَّفْسِيرِ/حدیث: 3009]

سیدنا عبدالرحمن بن غنم رضی اللہ عنہ فرماتے ہیں: میں نے معاذ بن جبل رضی اللہ عنہ سے اللہ تعالیٰ کے قول: (الم غُلِبَتِ الرُّومُ) (الروم: 1-2) کے متعلق پوچھا کہ (یہ لفظ) ” غُلِبَتْ “ ہے؟ انہوں نے جواباً کہا: مجھے رسول اللہ صلی اللہ علیہ وسلم نے ” الم غُلِبَتِ الرُّومُ “ پڑھایا ہے۔ ٭٭ ہم نے دونوں حدیثیں اسی اسناد کے ہمراہ تحریر کی ہیں تاہم محمد بن سعید شامی اس کتاب کے معیار کے راوی نہیں ہیں۔ [المستدرك على الصحيحين/كِتَابُ التَّفْسِيرِ/حدیث: 3010]

سیدنا عطیہ عوفی رضی اللہ عنہ فرماتے ہیں: میں نے ابن عمر رضی اللہ عنہ کے سامنے (یہ آیت) (اَللہُ الَّذِیْ خَلَقَکُمْ مِّنْ ضُعْفٍ ثُمَّ جَعَلَ مِنْم بَعْدِ ضُعْفٍ قُوَّۃً ثُمَّ جَعَلَ مِنْم بَعْدِ قُوَّۃٍ ضُعْفًا وَّ شَیْبَۃً) (الروم: 54) پڑھی تو سیدنا ابن عمر رضی اللہ عنہما نے اس آیت کو یوں پڑھا: (اَللہُ الَّذِیْ خَلَقَکُمْ مِنْ ضَعْفٍ ثُمَّ جَعَلَ مِنْ بَعْدِ ضُعْفٍ قُوَّۃً ثُمَّ جَعَلَ مِنْ بَعْدِ قُوَّۃٍ ضُعْفًا وَّ شَیْبَۃً) پھر ابن عمر رضی اللہ عنہ نے کہا: میں نے رسول اللہ صلی اللہ علیہ وسلم کے سامنے ایسے ہی تلاوت کی تھی جیسے تو نے میرے سامنے کی ہے اور پھر رسول اللہ صلی اللہ علیہ وسلم نے میری ایسے ہی غلطی درست کی جیسے میں نے تیری کی۔ ٭٭ عطیہ عوفی رضی اللہ عنہ یہ حدیث روایت کرنے میں منفرد ہیں۔ امام بخاری رحمۃ اللہ علیہ اور امام مسلم رحمۃ اللہ علیہ نے ان کی روایات نقل نہیں کی ہیں البتہ امام مسلم نے فضیل بن مرزوق کی روایات نقل کی ہیں۔ [المستدرك على الصحيحين/كِتَابُ التَّفْسِيرِ/حدیث: 3011]

سیدنا ابوہریرہ رضی اللہ عنہ فرماتے ہیں: نبی اکرم صلی اللہ علیہ وسلم نے (سورۂ سجدہ کی آیت نمبر 17 کی یوں) تلاوت کی: (فَلَا تَعْلَمُ نَفْسٌ مَا اُخْفِیَ لَھُمْ مِنْ قُرَّۃِ اَعْیُنٍ) (السجدہ: 17) “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3012]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے (سورۂ لقمان کی آیت 27 نمبر میں والبحر کے) رفع کے ساتھ (یاء) تلاوت کی ” وَالْبَحْرُ یَمُدُّہُ “۔ (نوٹ: تفسیر سمرقندی میں ہے کہ ابوعمرو نے اس آیت میں والبحر کی راء پر نصب پڑھا ہے۔ شفیق) ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3013]