سیدنا ابوہریرہ رضی اللہ عنہ فرماتے ہیں: جب رسول اللہ صلی اللہ علیہ وسلم غزوۂ اُحد سے واپس لوٹے تو مصعب بن عمیر رضی اللہ عنہ کی لاش کے پاس سے گزرے وہ راستے میں شہید ہوئے پڑے تھے۔ آپ نے ان کی لاش کے قریب کھڑے ہو کر ان کے لیے دعا مانگی پھر (سورۂ احزاب کی) یہ آیت پڑھی: (مِنَ الْمُؤْمِنِیْنَ رِجَالٌ صَدَقُوْا مَا عَاھَدُوا اللّٰہَ عَلَیْہِ فَمِنْھُمْ مَنْ قَضَی نَحْبَہٗ وَ مِنْھُمْ مَنْ یَّنْتَظِرُ وَ مَا بَدَّلُوْا تَبْدِیْلًا) (الاحزاب: 23) پھر رسول اللہ صلی اللہ علیہ وسلم نے فرمایا:” میں گواہی دیتا ہوں کہ یہ لوگ قیامت کے دن اللہ تعالیٰ کی بارگاہ میں گواہ ہوں گے، اس لیے تم ان کے پاس آیا کرو، ان کی زیارت کیا کرو۔ اور اس ذات کی قسم جس کے قبضہ قدرت میں میری جان ہے، قیامت تک جو شخص بھی ان کو سلام کہے گا: یہ اُس کا جواب دیں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3014]

سیدنا ابن عمر رضی اللہ عنہما سے روایت ہے کہ نبی اکرم نے (سورۂ سبا کی آیت 15 کی یوں) تلاوت کی: (لَقَدْ کَانَ لِسَبَائَ فِیْ مَسَاکِنِھِمْ) (نوٹ: حمزہ اور حفص نے مَسْکَنِھِمْ میں کاف پر فتحہ پڑھا ہے، اس طرح ان کے نزدیک یہ واحد ٹھہرا۔ جیسا کہ ہمارے بلاد میں روایت حفص میں یہی مشہور ہے، کسائی نے کاف نے نیچے کسرہ پڑھا اور باقی قراء نے اس کو مساکنھم جمع کے طور پر پڑھا ہے۔ شفیق) ٭٭ یہ نسخہ عموماً ہم نے ابوالعباس کے حوالے سے نقل کیا ہے جبکہ امام بخاری رحمۃ اللہ علیہ اور امام مسلم رحمۃ اللہ علیہ نے ابن البیلمانی کی روایات نقل نہیں کیں۔ [المستدرك على الصحيحين/كِتَابُ التَّفْسِيرِ/حدیث: 3015]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے (سورۂ سبا کی آیت 23 کی یوں) تلاوت کی (فُزِّعَ عَنْ قُلُوبِھِمْ، قَالُوْا مَا ذَا قَالَ رَبُّکُمْ)۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3016]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے (سورۂ یٰسین کی آیت 62 کی یوں) تلاوت کی: (وَلَقَدْ اَضَلَّ مِنْکُمْ جِبِلا کَثِیْرًا) (یٰس: 62) (اس میں جبلاً کو) مخففہ پڑھا۔ (نوٹ: نافع اور عاصم نے اس کو جِبِلًّا پڑھا، ابوعمرو اور ابن عامر نے جُبْلًا پڑھا، اور باقی قراء نے اس کو جُبِلًّا پڑھا۔ شفیق) ٭٭ اس حدیث میں اسماعیل بن رافع کے علاوہ تمام راوی ثقہ ہیں۔ امام بخاری رحمۃ اللہ علیہ اور امام مسلم رحمۃ اللہ علیہ نے اس کی روایات نقل نہیں کی ہیں۔ [المستدرك على الصحيحين/كِتَابُ التَّفْسِيرِ/حدیث: 3017]

سیدنا زبیر رضی اللہ عنہ فرماتے ہیں: جب (سورۂ زمر کی آیت 31): (اِنَّکَ مَیِّتٌ وَّ اِنَّہُمْ مَّیِّتُوْنَ، ثُمَّ اِنَّکُمْ یَوْمَ الْقِیٰمَۃِ عِنْدَ رَبِّکُمْ تَخْتَصِمُوْنَ) (الزمر: 31) نازل ہوئی تو سیدنا زبیر رضی اللہ عنہ نے عرض کی: یا رسول اللہ صلی اللہ علیہ وسلم ! کیا خاص گناہوں کے ہمراہ ہمارے دنیاوی معاملات بھی قیامت کے دن ہم پر دہرائے جائیں گے؟ آپ صلی اللہ علیہ وسلم نے فرمایا: جی ہاں۔ وہ ان پر اس وقت تک دہرائے جاتے رہیں گے جب تک کہ ہر صاحب حق کو اس کا حق نہ مل جائے۔ تو سیدنا زبیر رضی اللہ عنہ بولے: خدا کی قسم! وہاں کا معاملہ تو بہت سخت ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3018]

سیدہ اسماء بنت یزید رضی اللہ عنہا فرماتی ہیں: نبی اکرم صلی اللہ علیہ وسلم نے (سورۂ انعام کی آیت 141 کی) تلاوت کی: (یَا عِبَادِیَ الَّذِیْنَ اَسْرَفُوْا عَلٰٓی اَنْفُسِھِمْ لَا تَقْنَطُوْا مِنْ رَحْمَۃِ اللّٰہِ اِنَّ اللّٰہَ یَغْفِرُ الذُّنُوْبَ جَمِیْعً وَلَا یُبَالِی) (الانعام: 141) “ ٭٭ یہ حدیث غریب عالی ہے اور میں نے سوائے اس ایک حدیث کے شہر کی اور کوئی حدیث اپنی کتاب میں درج نہیں کی۔ [المستدرك على الصحيحين/كِتَابُ التَّفْسِيرِ/حدیث: 3019]

سیدنا عبداللہ بن مسعود رضی اللہ عنہ فرماتے ہیں: مجھے رسول اللہ صلی اللہ علیہ وسلم نے (سورۂ ذاریات کی آیت 58 یوں) پڑھائی: (اِنِّیْ اَنَا الرَّزَّاقُ ذُوالْقُوَّۃِ الْمَتِیْنُ) “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے نزدیک صحیح ہے۔ [المستدرك على الصحيحين/كِتَابُ التَّفْسِيرِ/حدیث: 3020]

سیدنا علی رضی اللہ عنہ فرماتے ہیں: نبی اکرم صلی اللہ علیہ وسلم نے (سورۂ طور کی آیت نمبر 21 یوں) پڑھی: (الَّذِیْنَ ٰامَنُوْا وَ اتَّبَعَتْھُمْ ذُرِّیَّتُھُمْ بِاِیْمَانٍ اَلْحَقْنَا بِھِمْ ذُرِّیَّتَہُمْ) (الطور: 21) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3021]

سیدنا عبداللہ بن مسعود رضی اللہ عنہ فرماتے ہیں: میں نے رسول اللہ صلی اللہ علیہ وسلم کے سامنے (سورۃ القمر کی آیت نمبر15) (فَھَلْ مِنْ مُذَّکِرٍ) (مذکر کے) ذال کے ساتھ پڑھی تو نبی اکرم صلی اللہ علیہ وسلم نے (” فَھَلْ مِنْ مُدَّکِر) دال کے ساتھ پڑھا۔ ٭٭ اس حدیث کو امام بخاری رحمۃ اللہ علیہ اور امام مسلم رحمۃ اللہ علیہ نے شعبہ کے واسطے سے ابواسحاق سے مختصراً روایت کی ہے۔ [المستدرك على الصحيحين/كِتَابُ التَّفْسِيرِ/حدیث: 3022]

سیدنا ابوبکر رضی اللہ عنہ سے روایت ہے کہ نبی اکرم صلی اللہ علیہ وسلم نے (سورۂ رحمن کی آیت 76 یوں) تلاوت کی ” (مُتَّکِئِیْنَ عَلٰی رَفْرَفٍ خُضْرٍ وَ عَبْقَرِیٍّ حِسَانٍ) (الرحمن: 76) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3023]