سیدنا ابن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے (سورۂ واقعہ کی آیت 55 یوں) پڑھی: (فَشَارِبُوْنَ شُرْبَ الْھِیْمِ) (الواقعۃ: 55) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3024]

سیدنا عیسیٰ بن مسعود بن الحکم الزرقی سے روایت ہے کہ ان کی دادی حبیبہ بنت شریف حج کے دنوں میں اپنی بیٹی ” ابنۃ العجماء “ کے ہمراہ تھیں۔ (راوی) کہتے ہیں: ان کے پاس سیدنا بدیل بن ورقاء رضی اللہ عنہ رسول اللہ صلی اللہ علیہ وسلم کی سواری پر اپنا کجاوہ ڈال کر آئے اور یوں نداء دی: بے شک رسول اللہ صلی اللہ علیہ وسلم نے فرمایا: جو شخص روزہ سے ہے وہ روزہ چھوڑ دے کیونکہ یہ دن کھانے اور پینے کے دن ہیں۔ ٭٭ یہ حدیث اس کتاب کے معیار کی نہیں ہے۔ [المستدرك على الصحيحين/كِتَابُ التَّفْسِيرِ/حدیث: 3025]

سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے (سورۂ واقعہ کی آیت نمبر 89 کی یوں) تلاوت کی: (فَرَوْحٌ وَرَیْحَان) (الواقعۃ: 89) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3026]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے سورۃ الطلاق کی پہلی آیت یوں تلاوت کی: (فَطَلِّقُوْھُنَّ فِیْ قَبْلِ عِدَّتِھِنَّ) (الطلاق: 1) ٭٭ امام مسلم رحمۃ اللہ علیہ نے یہ طویل حدیث ابن جریح کے حوالے سے ابن الزبیر سے روایت کی کہ عبدالرحمن بن ایمن نے سیدنا عبداللہ بن عمر رضی اللہ عنہما سے ایک ایسے شخص کے متعلق مسئلہ پوچھا جس نے اپنی بیوی کو حیض کی حالت میں طلاق دی تھی اور میرا خیال ہے کہ امام مسلم رحمۃ اللہ علیہ نے الفاظ یہی روایت کیے ہیں۔ [المستدرك على الصحيحين/كِتَابُ التَّفْسِيرِ/حدیث: 3027]