سیدنا ابن عباس رضی اللہ عنہما فرماتے ہیں: جب رسول اللہ صلی اللہ علیہ وسلم نے کعبہ کی جانب رخ کر کے نماز پڑھنا شروع کر دی تو لوگوں نے پوچھا: یا رسول اللہ صلی اللہ علیہ وسلم ! ان لوگوں کا کیا بنے گا جو بیت المقدس کی طرف نمازیں پڑھتے ہوئے فوت ہوئے ہیں؟ تو اللہ تعالیٰ نے یہ آیت نازل فرمائی:” وَ مَا کَانَ اللّٰہُ لِیُضِیْعَ اِیْمَانَکُمْ “ (البقرۃ: 143) ” اور اللہ کی یہ شان نہیں کہ تمہارا ایمان اکارت کرے “۔ “ عبیداللہ بن موسیٰ کہتے ہیں: یہ حدیث اس بات کی دلیل ہے کہ نماز ” ایمان “ میں سے ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3100]

سیدنا علی رضی اللہ عنہ (اللہ تعالیٰ کے ارشاد):” فَوَلِّ وَجْھَکَ شَطْرَ الْمَسْجِدِ الْحَرَامِ “ (البقرۃ: 144) ” ابھی اپنا چہرہ پھیر دو مسجد حرام کی طرف “۔ (کے متعلق فرماتے ہیں اس میں شطر سے مراد) اس کی ” جانب “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3101]

سیدنا یحیی بن قطہ کہتے ہیں: میں نے عبداللہ بن عمرو رضی اللہ عنہ کو مسجد حرام میں منبر کے سامنے بیٹھے دیکھا۔ پھر انہوں نے یہ آیت تلاوت کی: فَلَنُوَلِّیَنَّکَ قِبْلَۃً تَرْضَاھَا “ (البقرۃ: 144) ” تو ضرور ہم تمہیں پھیر دیں گے اس قبلہ کی طرف جس میں تمہاری خوشی ہے “۔ انہوں نے کہا: کعبہ کے میزاب کی جانب۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3102]