سیدہ ام کلثوم بنت عقبہ رضی اللہ عنہا سب سے پہلے ہجرت کرنے والی خواتین میں شمار ہوتی ہیں آپ اللہ تعالیٰ کے ارشاد:” وَاسْتَعِیْنُوْا بِالصَّبْرِ وَالصَّلَاۃِ “ (البقرۃ: 45) ” اور صبر اور نماز سے مدد چاہو “۔ کے حوالے سے فرماتی ہیں: ایک دفعہ سیدنا عبدالرحمن بن عوف رضی اللہ عنہ کو غشی آ گئی، لوگ یہ سمجھے کہ ان کا سانس ڈوب گیا ہے چنانچہ ان کی بیوی ام کلثوم رضی اللہ عنہا مسجد میں حکمِ الٰہی کے مطابق صبر اور نماز سے مدد حاصل کرنے گئیں، جب سیدنا عبدالرحمن رضی اللہ عنہ کو افاقہ ہوا، تو وہ بولے: کیا ابھی مجھ پر غشی طاری ہوئی تھی؟ لوگوں نے کہا: جی ہاں۔ تو عبدالرحمن بولے: تم لوگ سچ کہہ رہے ہو ابھی میرے پاس دو فرشتے آئے تھے، انہوں نے مجھے کہا: چل ہم تیرا فیصلہ عزیز اور امین (یعنی اللہ تعالیٰ) کی بارگاہ میں پیش کرتے ہیں۔ تو ایک فرشتے نے ان سے کہا: اس کو واپس لے جاؤ کیونکہ یہ ان لوگوں میں سے ہے جن کو ماں کے پیٹ میں ہی نیک بخت لکھ دیا گیا تھا اور اس کی اولاد اس سے فائدہ حاصل کرے گی جس قدر اللہ تعالیٰ چاہے گا۔ اس کے بعد پورا ایک مہینہ سیدنا عبدالرحمن رضی اللہ عنہ زندہ رہے پھر ان کا انتقال ہو گیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3103]

سیدنا ابن عباس رضی اللہ عنہما فرماتے ہیں: ایک مرتبہ دوران سفر ان کو کسی رشتہ دار کی وفات کی خبر ملی تو انہوں نے دو رکعت نماز ادا کی پھر بولے: ہم نے وہی کیا ہے جس کا ہمارے اللہ تعالیٰ نے ہمیں حکم دیا ہے ” کہ تم نماز اور صبر سے مدد حاصل کرو “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3104]

سیدنا عمر رضی اللہ عنہ نے فرمایا: دونوں گواہ اچھے ہیں اور علاوۃ (سریا گردن کا اوپر کا حصہ) اچھی ہے۔ الَّذِیْنَ اِذَآ اَصَابَتْھُمْ مُّصِیْبَۃٌ قَالُوْآ اِنَّا لِلّٰہِ وَ اِنَّآ اِلَیْہِ رَاجِعُوْنَ (البقرۃ: 156) ” کہ جب ان پر کوئی مصیبت پڑے تو کہیں ہم اللہ کے مال ہیں اور ہم کو اسی کی طرف پھرنا “۔ (اُولٰٓئِکَ عَلَیْھِمْ صَلَوٰتٌ مِّنْ رَّبِّھِمْ وَ رَحْمَۃٌ) (البقرۃ: 157) ” یہ وہ لوگ ہیں جن پر ان کے رب کی درودیں ہیں اور رحمتیں “۔ دونوں گواہ اچھے ہیں۔ (تفسیر قرطبی میں ہے کہ عدلان سے یہاں پر مراد صلاۃ اور رحمت ہے۔ شفیق)، (وَ اُولٰٓئِکَ ہُمُ الْمُہْتَدُوْنَ) (البقرۃ: 157) ” اور یہی لوگ راہ پر ہیں “۔ اور یہ الْعِلَاوَۃ اچھی ہے۔ (تفسیر قرطبی میں ہے کہ یہاں پر اس سے مراد ہدایت حاصل کرنا ہے۔ شفیق) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ اور میں نہیں جانتا کہ ہمارے اَئمہ کے درمیان اس بات میں اختلاف ہو کہ سیدنا سعید بن المسیب رضی اللہ عنہ نے سیدنا عمر رضی اللہ عنہ کا دور پایا ہے۔ تاہم سیدنا سعید بن مسیّب رضی اللہ عنہ کے سیدنا عمر رضی اللہ عنہ سے سماع کے متعلق اختلاف موجود ہے۔ [المستدرك على الصحيحين/كِتَابُ التَّفْسِيرِ/حدیث: 3105]