سیدنا (عبداللہ) بن عباس رضی اللہ عنہما فرماتے ہیں، یہود اور نصاریٰ کے ذبیحے تم پر اس لیے حلال ہیں کہ وہ لوگ تورات اور انجیل پر ایمان رکھتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3252]

سیدنا (عبداللہ) بن عباس رضی اللہ عنہما اللہ تعالیٰ کے ارشاد: جعل فیکم انبیاء ” تم میں سے پیغمبر کیے “۔ کے متعلق فرماتے ہیں:” جعل منکم انبیاء “ (یعنی یہاں پر ” فی “ بمعنی ” من “ ہے) اور وجعلکم ملوکاً ” اور تمہیں بادشاہ کیا “ کے متعلق فرماتے ہیں: (اس سے مراد) عورت اور خادم ہے اور وَ اٰتٰکُمْ مَّا لَمْ یُؤْتِ اَحَدًا مِّنَ الْعٰلَمِیْنَ (المائدۃ: 20) ” اور تمہیں وہ دیا جو آج سارے جہاں میں کسی کو نہ دیا “۔ سے مراد وہ لوگ ہیں جو آج تمہارے اندر موجود ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3253]

سیدنا علی رضی اللہ عنہ اللہ تعالیٰ کے ارشاد: رَبَّنَآ اَرِنَا الَّذَیْنِ اَضَلّٰنَا مِنَ الْجِنِّ وَ الْاِنْسِ نَجْعَلْھُمَا تَحْتَ اَقْدَامِنَا (فصلت: 29) ” اے ہمارے رب ہمیں دکھا وہ دونوں جن اور آدمی جنہوں نے ہمیں گمراہ کیا کہ ہم انہیں پاؤں تلے ڈالیں “۔ کے متعلق فرماتے ہیں: وہ ابلیس اور آدم علیہ السلام کا وہ بیٹا ہے جس نے اپنے بھائی کو قتل کیا تھا (یعنی قابیل)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3254]