قبیصہ بن ذوئیب سے روایت ہے کہ ایک آدمی نے عثمان بن عفان رضی اللہ عنہ سے ایسی دو بہنوں کے متعلق پوچھا جو ایک آدمی کی ملکیت میں ہوں، کیا وہ ان دونوں سے صحبت کر سکتا ہے؟ تو عثمان رضی اللہ عنہ نے فرمایا: ایک آیت نے ان دونوں کو حلال کیا ہے جبکہ دوسری آیت نے دونوں کو حرام کیا ہے، اور رہی میری بات تو میں یہ کام کرنا پسند نہیں کرتا۔ قبیصہ نے کہا کہ وہ آدمی ان کے پاس سے نکلا اور نبی صلی اللہ علیہ وسلم کے صحابہ میں سے ایک آدمی سے ملا تو اس نے کہا: اگر مجھے اس معاملے کا کچھ بھی اختیار ہوتا، پھر میں کسی آدمی کو پاتا جس نے یہ کام کیا ہوتا تو میں اس کو عبرت بنا دیتا۔ امام مالک رحمہ اللہ نے فرمایا: ابن شہاب نے کہا کہ میرے خیال میں وہ علی بن ابی طالب رضی اللہ عنہ ہیں۔ امام مالک رحمہ اللہ نے فرمایا: مجھے زبیر بن عوام رضی اللہ عنہ کے حوالے سے بھی اسی طرح اطلاع ملی ہے۔ [المستدرك على الصحيحين/كِتَابُ التَّفْسِيرِ/حدیث: 3252]

عبید اللہ بن عتبہ سے روایت ہے کہ عمر بن خطاب رضی اللہ عنہ سے ایک عورت اور اس کی بیٹی، جو ایک ہی آدمی کی لونڈیاں ہوں، کے متعلق سوال کیا گیا: کیا آدمی ان دونوں میں سے ایک سے وطی کرنے کے بعد دوسری سے کر سکتا ہے؟ تو عمر رضی اللہ عنہ نے فرمایا: میں پسند نہیں کرتا کہ ان دونوں سے بیک وقت وطی کو جائز قرار دوں۔ [المستدرك على الصحيحين/كِتَابُ التَّفْسِيرِ/حدیث: 3253]

عبداللہ بن عتبہ نے بیان کیا کہ عمر رضی اللہ عنہ سے ماں اور اس کی بیٹی جو ایک ہی شخص کی ملکیت میں ہوں، کے متعلق سوال کیا گیا تو آپ نے فرمایا: میں پسند نہیں کرتا کہ ہم ان دونوں کو جائز قرار دیں، عبید اللہ نے کہا کہ میرے باپ نے کہا: میں چاہتا ہوں کہ عمر رضی اللہ عنہ اس معاملے میں اس سے بھی زیادہ سخت ہوتے۔ [المستدرك على الصحيحين/كِتَابُ التَّفْسِيرِ/حدیث: 3254]