سیدنا حذیفہ رضی اللہ عنہ سے روایت ہے: انہوں نے ایک قاری کو یہ پڑھتے سنا: یٰٓاَیُّھَا الَّذِیْنَ ٰامَنُوا اتَّقُوا اللّٰہَ وَابْتَغُوْآ اِلَیْہِ الْوَسِیْلَۃَ (المائدۃ: 35) ” اے ایمان والو اللہ سے ڈرو اس کی طرف وسیلہ ڈھونڈو “۔ اور فرمایا: (اس سے مراد) ” قربت “ ہے۔ پھر فرمایا: محمد صلی اللہ علیہ وسلم کے اصحاب میں سے جو محفوظ ہیں وہ یہ جانتے ہیں کہ ” ابن ام معبد “ وسیلہ کے اعتبار سے اللہ تعالیٰ کے سب سے زیادہ قریب تھے۔ [المستدرك على الصحيحين/كِتَابُ التَّفْسِيرِ/حدیث: 3255]

سیدنا (عبداللہ) بن عباس رضی اللہ عنہما فرماتے ہیں: سورۃ مائدہ کی دو آیتیں منسوخ ہیں: (1) فَاحْکُمْ بَیْنَھُمْ اَوْ اَعْرِضْ عَنْھُمْ (المائدۃ: 42) ” تو ان میں فیصلہ فرماؤ یا ان سے منہ پھیر لو “۔۔ اور (2) وَ اَنِ احْکُمْ بَیْنَھُمْ بِمَآ اَنْزَلَ اللّٰہُ وَ لَاتَتَّبِعْ اَھْوَآئَھُمْ (المائدۃ: 49) ” اور یہ کہ اے مسلمان اللہ کے اتارے پر حکم کر اور ان کی خواہشوں پر نہ چل “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3256]

سیدنا ہمام فرماتے ہیں: ہم سیدنا حذیفہ رضی اللہ عنہ کے پاس موجود تھے تو لوگوں سے اس آیت کا ذکر کیا: وَمَنْ لَّمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ھُمُ الْکٰفِرُوْنَ (المائدۃ: 44) ” اور جو اللہ کے اُتارے پر حکم نہ کرے وہی لوگ کافر ہیں “۔ تو ایک شخص نے کہا: یہ حکم تو بنی اسرائیل کے متعلق ہے تو سیدنا حذیفہ رضی اللہ عنہ بولے: جی ہاں۔ بھائی تو بنی اسرائیل ہی ہیں۔ اگر تمہارے لیے میٹھا اور ان کے لیے کڑوا ہو، ہرگز نہیں۔ اس ذات کی قسم جس کے قبضہ میں میری جان ہے (تم ان کے برابر ہو گے) حتیٰ کہ بالکل انہی کے طریقوں پر عمل کرو گے اور قدم بقدم، ہوبہو بالکل انہی جیسے ہو جاؤ گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3257]

سیدنا (عبداللہ) بن عباس رضی اللہ عنہما فرماتے ہیں: کفر صرف دین سے منحرف ہونا ہی نہیں ہے جیسا کہ لوگ سمجھتے ہیں بلکہ: وَمَنْ لَّمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ھُمُ الْکٰفِرُوْنَ (المائدۃ: 44) ” اور جو اللہ کے اُتارے پر حکم نہ کرے وہی لوگ کافر ہیں “۔ کفر کے مختلف مراتب ہوتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3258]

سیدنا عیاض اشعری رضی اللہ عنہ فرماتے ہیں: جب یہ آیت: فَسَوْف یَاْتِی اللّٰہُ بِقَوْمٍ یُّحِبُّھُمْ وَ یُحِبُّوْنَہٗٓ (المائدۃ: 54) ” تو عنقریب اللہ ایسے لوگ لائے گا کہ وہ اللہ کے پیارے اور اللہ ان کا پیارا “۔ تو رسول اللہ صلی اللہ علیہ وسلم نے فرمایا: اے ابوموسیٰ وہ تیری ہی قوم ہے (یہ کہتے ہوئے) رسول اللہ صلی اللہ علیہ وسلم نے اپنے ہاتھ سے سیدنا ابوموسیٰ کی طرف اشارہ کیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3259]