سیدنا سعید بن المسیب رضی اللہ عنہ اپنے والد کا بیان نقل کرتے ہیں: جنگ احد کے دن ابی بن خلف ناپاک ارادہ لے کر رسول اکرم صلی اللہ علیہ وسلم کی جانب بڑھا۔ لیکن کچھ صحابہ کرام رضوان اللہ علیہم اجمعین اس کے آڑے آ گئے۔ آپ نے ان کو حکم دیا کہ اس کا راستہ چھوڑ دیں تو بنی عبدالدار کے بھائی سیدنا مصعب بن عمیر رضی اللہ عنہ آپ کی جانب رخ کر کے کھڑے ہو گئے اور رسول اللہ صلی اللہ علیہ وسلم نے ابی بن خلف کی زرہ اور خود کے درمیان کچھ خالی جگہ دیکھی آپ نے وہیں پر تیر کا نشانہ لگایا (جو اس کو لگا اور) وہ گھوڑے سے نیچے آ گرا، لیکن اس کے زخم سے خون کا ایک قطرہ تک نہ نکلا اس نے اس کا ایک پر توڑ دیا پھر وہ اپنے ساتھیوں میں آیا تو وہ بھینسے کی طرح آواز نکال رہا تھا، لوگوں نے اس سے کہا: تجھے اتنا عاجز کس چیز نے کر دیا ہے؟ یہ ایک ہلکی سی خراش ہی تو آئی ہے پھر اس نے اپنے ساتھیوں کو رسول اللہ صلی اللہ علیہ وسلم کا یہ فرمان بتایا (کہ آپ نے فرمایا ہے) ” ابی کو میں قتل کروں گا “ پھر اس نے کہا: اس ذات کی قسم! جس کے قبضہ و قدرت میں میری جان ہے جو تکلیف مجھے ہو رہی ہے اگر یہ ” ذی المجاز “ (علاقے) کے لوگوں کو ہوتی تو سب مر جاتے، پھر ابی بن خلف مکہ آنے سے پہلے واصل جہنم ہو گیا اور بربادی ہے جہنم والوں کے لیے۔ تو اللہ تعالیٰ نے اس کے متعلق یہ آیت نازل فرمائی: وَمَا رَمَیْتَ اِذْ رَمَیْتَ وَٰلکِنَّ اللّٰہَ رَمٰی (الانفال: 17) ” اے محبوب وہ خاک جو تم نے پھینکی تم نے نہ پھینکی تھی بلکہ اللہ نے پھینکی “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3302]