سیدنا عبداللہ بن عباس رضی اللہ عنہما سے اس آیت کے متعلق پوچھا گیا: تَتَّخِذُوْنَ مِنْہُ سَکَرًا وَّ رِزْقًا حَسَنًا (النحل: 67) ” اس سے نبیذ بناتے ہو اور اچھا رزق “۔ تو آپ نے فرمایا:” سکر “ وہ ہے جو تم اس کے پھل سے حرام چیز تیار کرتے ہو اور ” رزق حسن “ وہ ہے جو تم اس کے پھل سے حلال اشیاء تیار کرتے ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3395]

سیدنا عبداللہ رضی اللہ عنہ، اللہ تعالیٰ کے ارشاد: بَنِیْنَ وَ حَفَدَۃً (النحل: 72) ” بیٹے اور پوتے نواسے “۔ کے متعلق فرماتے ہیں: الحفدۃ (سے مراد) دو بہنیں ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3396]

سیدنا عبداللہ رضی اللہ عنہ، اللہ تعالیٰ کے ارشاد: زِدْٰنھُمْ عَذَابًا فَوْقَ العَذَابِ (النحل: 88) ” ہم نے عذاب پر عذاب بڑھایا “۔ کے متعلق فرماتے ہیں: ایسے بچھو (مسلط کیے جائیں گے) جن کے دانت کھجور کے لمبے درختوں کی مانند ہوں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3397]