سیدنا سلمان رضی اللہ عنہ فرماتے ہیں: دوزخ کی آگ سیاہ ہے نہ اس کے شعلے میں چمک ہے اور نہ اس کے انگارے ہیں۔ پھر آپ نے اس آیت کی تلاوت کی: کُلَّمَآ اَرَادُوْآ اَنْ یّخْرُجُوْا مِنْھَا مِنْ غَمٍّ اُعِیْدُوْا فِیْھَا (الحج: 22) ” جب گھٹن کے سبب اس میں سے نکلنا چاہیں گے پھر اسی میں لوٹا دیے جائیں گے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3500]

سیدنا عبداللہ بن مسعود رضی اللہ عنہما اللہ تعالیٰ کے ارشاد: وَمَنْ یُّرِدْ فِیْہِ بِاِلْحَادٍ بِظُلْمٍ نُذِقْہُ مِنْ عَذَابٍ اَلِیْمٍ (الحج: 25) ” اور جو اس میں کسی زیادتی کا ناحق ارادہ کرے ہم اسے دردناک عذاب چکھائیں گے “۔ (،) کے متعلق فرماتے ہیں: اگر کوئی شخص کسی گناہ کا صرف ارادہ کرے یعنی جب تک وہ اس پر عمل نہیں کرے گا اس کے نامۂ اعمال میں یہ گناہ نہیں لکھا جائے گا اور اگر کوئی بیت اللہ کے قریب کسی شخص کو قتل کرنے کا ارادہ کرے جبکہ وہ شخص ابھی (مقام) عدن سے بھی زیادہ دور ہو، اللہ تعالیٰ اس کو دردناک عذاب چکھائے گا۔ ٭٭ اس حدیث کو شعبہ نے اسماعیل بن عبدالرحمن السدی کے حوالے سے ” مرہ “ سے مرفوعاً روایت کیا ہے (جیسا کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3501]

سیدنا عبداللہ بن مسعود رضی اللہ عنہ سے اللہ تعالیٰ کے ارشاد: وَمَنْ یُّرِدْ فِیْہِ بِاِلْحَادٍ بِظُلْمٍ نُذِقْہُ مِنْ عَذَابٍ اَلِیْمٍ (الحج: 25) ” اور جو اس میں کسی زیادتی کا ناحق ارادہ کرے ہم اسے دردناک عذاب چکھائیں گے “۔ (،) کے متعلق مرفوعاً روایت ہے۔ اگر کوئی شخص بیت اللہ میں کسی زیادتی کا ارادہ کرے اور وہ عدن سے بھی دور ہو اللہ تعالیٰ اس کو دردناک عذاب چکھائے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3502]

سیدنا عیسیٰ بن عاصم رحمۃ اللہ علیہ کا بیان ہے کہ سیدنا عبداللہ بن عمر رضی اللہ عنہما، سیدنا عبداللہ بن الزبیر رضی اللہ عنہ کے پاس تشریف لائے اور بولے: اے ابن الزبیر رضی اللہ عنہ! اللہ تعالیٰ کے حرم میں زیادتی سے بچو کیونکہ رسول اللہ صلی اللہ علیہ وسلم نے ارشاد فرمایا: اس میں قریش کا ایک ایسا شخص زیادتی کرے گا کہ اس کے گناہوں کا اگر تمام جن و انس کے گناہوں سے موازنہ کیا جائے تو اس کے گناہ بھاری ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3503]