سیدنا عبداللہ بن عباس رضی اللہ عنہما فرماتے ہیں:” تبع “ کعبہ کا ارادہ لے کر نکلا جب وہ (مکہ اور مدینہ کے درمیان ایک مقام) کراع الغمیم میں پہنچا تو اللہ تعالیٰ نے اس پر اس قدر شدید آندھی بھیجی کہ کوئی کھڑا ہوا آسانی سے کھڑا نہ رہ سکا، کھڑا ہونے والا چلا اور پھر اندھیری سے ان کو شدید مشقت کا سامنا کرنا پڑا۔ تبع نے وہاں کے دو مذہبی پیشواؤں کو بلوایا اور ان سے پوچھا: کہ ہم پر یہ کیسا عذاب مسلط کر دیا گیا ہے؟ انہوں نے کہا: کیا تم ہمیں امان دیتے ہو؟ اس نے کہا تمہارے لیے امن ہے۔ انہوں نے کہا: تو اس گھر کا ارادہ کر کے نکلا ہے اور اس کی طرف (برا) ارادہ لے کر آنے والے کو اللہ تعالیٰ خود روک لیتا ہے۔ اس نے کہا: اب اس سے میں کیسے بچ سکتا ہوں؟ انہوں نے کہا: احرام باندھ کر تلبیہ پڑھتے ہوئے یہاں داخل ہو پھر بیت اللہ کا طواف کر اور وہاں کے لوگوں کو خوف زدہ مت کرنا۔ اس نے کہا: اگر میں یہ سب کر لوں تو کیا یہ آندھی مجھے چھوڑ دے گی؟ انہوں نے کہا: ہاں۔ پھر اس نے احرام باندھا، تلبیہ کہا، سیدنا عبداللہ بن عباس فرماتے ہیں: وہ آندھی واپس چلی گئی، جیسے اندھیری رات چھٹ جاتی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3504]

سیدنا عبداللہ بن عباس رضی اللہ عنہما فرماتے ہیں: جب سیدنا ابراہیم علیہ السلام بیت اللہ کی تعمیر سے فارغ ہوئے تو عرض کی: اے میرے رب! میں فارغ ہو چکا ہوں۔ اللہ تعالیٰ نے فرمایا: اَذِّنْ فِی النَّاسِ بِالْحَجِّ (الحج: 27) ” اور لوگوں میں حج کی عام ندا کر دے “۔ عرض کی: اے میرے رب، میری آواز (ان سب لوگوں تک) کیسے پہنچے گی؟ اللہ تعالیٰ نے فرمایا: تم اعلان کرو آپ کی آواز پہنچانا ہمارے ذمہ ہے۔ عرض کی: اے میرے رب! میں کیا بولوں؟ اللہ تعالیٰ نے فرمایا: کہو ” اے لوگو! تم پر بیت العتیق کا حج فرض کیا گیا ہے “۔ آپ کی اس آواز کو زمین و آسمان کی تمام مخلوقات نے سنا، کیا تم یہ نہیں دیکھتے کہ لوگ دنیا کے کونے کونے سے تلبیہ کہتے ہوئے یہاں حاضر ہوتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3505]