سیدنا عبداللہ بن عباس رضی اللہ عنہما سے روایت ہے کہ ہدہد (پانی کی تلاش میں) سیدنا سلیمان علیہ السلام کی رہنمائی کرتا تھا، راوی کہتے ہیں کہ میں نے عرض کیا: یہ کیسے ممکن ہے جبکہ ہدہد کے لیے تو جال بچھایا جاتا ہے اور اس پر مٹی ڈال دی جاتی ہے (تب اسے وہ جال کیوں نظر نہیں آتا)؟ تو انہوں نے (سخت لہجے میں) فرمایا: جب قضا (تقدیر) آ جاتی ہے تو بصارت جاتی رہتی ہے (یعنی بندہ اندھا ہو جاتا ہے)۔ [المستدرك على الصحيحين/كِتَابُ التَّفْسِيرِ/حدیث: 3567]

سیدنا عبداللہ بن عباس رضی اللہ عنہما سے اللہ تعالیٰ کے اس فرمان ﴿لَأُعَذِّبَنَّهُ عَذَابًا شَدِيدًا﴾ [سورة النمل: 21] کے متعلق روایت ہے، انہوں نے فرمایا: (اس سے مراد) اس کے پر نوچ لینا ہے، ابن عباس رضی اللہ عنہما نے مزید فرمایا: سیدنا سلیمان بن داود علیہ السلام کے لیے چھ لاکھ کرسیاں بچھائی جاتی تھیں، پھر انسانوں کے شرفاء آ کر ان کے قریب بیٹھتے، پھر جنات کے شرفاء آ کر انسانوں کے پیچھے بیٹھتے، پھر آپ پرندوں کو بلاتے تو وہ ان پر (پروں کا) سایہ کر دیتے، پھر آپ ہوا کو حکم دیتے تو وہ ان سب کو اٹھا لیتی، آپ ایک صبح میں ایک مہینے کی مسافت طے کر لیتے تھے۔ ایک مرتبہ جب آپ ایک چٹیل میدان میں سفر کر رہے تھے تو پانی کی ضرورت پیش آئی، ہدہد آیا اور زمین کریدنے لگا تو اس نے پانی کی جگہ ڈھونڈ لی، پھر شیاطین آئے اور انہوں نے اس جگہ کو ایسے ادھیڑا جیسے کھال ادھیڑی جاتی ہے، تو انہوں نے پانی پا لیا۔ تب نافع بن ازرق نے پوچھا: اے حق پر ٹھہرنے والے! آپ نے ہدہد کو دیکھا کہ وہ کیسے زمین کرید کر پانی کی جگہ تلاش کر لیتا ہے، جبکہ وہ خود شکاری کے جال کی طرف آتا ہے اور اسے دیکھ رہا ہوتا ہے پھر بھی وہ اس کی گردن میں پھنس جاتا ہے؟! ابن عباس رضی اللہ عنہما نے فرمایا: بے شک تقدیر جب آ جائے تو بصارت کے سامنے حائل ہو جاتی ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3568]

ام المومنین سیدہ عائشہ رضی اللہ عنہا سے روایت ہے، انہوں نے فرمایا: رسول اللہ صلی اللہ علیہ وسلم نے (بدر کے مقتولین کے متعلق) یہ فرمایا تھا: ”وہ اب یقیناً جان چکے ہیں کہ جو کچھ میں ان سے دنیا میں کہتا تھا وہ حق ہے،“ جبکہ اللہ تعالیٰ نے اپنے نبی صلی اللہ علیہ وسلم سے فرمایا ہے: ﴿إِنَّكَ لَا تُسْمِعُ الْمَوْتَى وَلَا تُسْمِعُ الصُّمَّ الدُّعَاءَ إِذَا وَلَّوْا مُدْبِرِينَ﴾ [سورة النمل: 80] ”بے شک آپ مردوں کو نہیں سنا سکتے اور نہ بہروں کو پکار سنا سکتے ہیں جب وہ پیٹھ پھیر کر مڑ جائیں۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3569]

سیدنا عبداللہ بن مسعود رضی اللہ عنہ سے اللہ تعالیٰ کے اس فرمان ﴿مَنْ جَاءَ بِالْحَسَنَةِ﴾ [سورة النمل: 89] کے متعلق روایت ہے، انہوں نے فرمایا: اس سے مراد وہ شخص ہے جو «لا اله الا الله» لے کر آئے، اور ﴿وَمَنْ جَاءَ بِالسَّيِّئَةِ﴾ [سورة النمل: 90] سے مراد شرک ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3570]