اسود بن ہلال سے روایت ہے کہ ایک شخص سیدنا عبداللہ بن مسعود رضی اللہ عنہ کے پاس آیا اور اس آیت کے بارے میں سوال کیا: ﴿وَمَنْ يُوقَ شُحَّ نَفْسِهِ فَأُولَئِكَ هُمُ الْمُفْلِحُونَ﴾ [التغابن: 16] اور کہنے لگا کہ میں ایسا شخص ہوں کہ مجھ سے سخاوت نہیں ہو پاتی اور میرے ہاتھ سے کچھ نکلتا نہیں ہے، مجھے خوف ہے کہ کہیں یہ آیت مجھ پر صادق نہ آتی ہو؟ تو سیدنا عبداللہ نے فرمایا: ”تم نے بخل کا ذکر کیا ہے اور بخل بہت ہی بری چیز ہے، لیکن اللہ نے قرآن میں جس «شُحّ» (نفس کے لالچ) کا ذکر کیا ہے وہ یہ نہیں ہے (جو تم سمجھ رہے ہو)، بلکہ اس سے مراد یہ ہے کہ تم اپنے بھائی یا کسی دوسرے کے مال پر نظر رکھو اور اسے ناحق ہڑپ کر جاؤ۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3857]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ عزوجل فرماتا ہے: میں نے اپنے بندے سے قرض مانگا مگر اس نے مجھے قرض دینے سے انکار کر دیا، اور وہ نادانی میں کہتا ہے: ہائے زمانہ! ہائے زمانہ! حالانکہ میں ہی زمانہ (کا خالق و مالک) ہوں۔“ پھر سیدنا ابوہریرہ رضی اللہ عنہ نے اللہ عزوجل کا یہ فرمان تلاوت فرمایا: ﴿إِنْ تُقْرِضُوا اللَّهَ قَرْضًا حَسَنًا يُضَاعِفْهُ لَكُمْ﴾ [التغابن: 17] ۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3858]