ام المومنین سیدہ عائشہ رضی اللہ عنہا فرماتی ہیں: نبی اکرم صلی اللہ علیہ وسلم وتروں کی پہلی رکعت میں (سَبِّحِ اسْمَ رَبِّکَ الْاَعْلَی) پڑھتے اور دوسری میں (قُلْ یٰٓاَیُّھَا الْکٰفِرُوْنَ) اور تیسری میں چاروں قل پڑھا کرتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ تاہم امام بخاری رحمۃ اللہ علیہ نے اس کو ابن ابی ابراہیم کے واسطے سے نقل کیا ہے جبکہ یہ اضافہ صرف یحیی بن ایوب کی روایت سے ثابت ہے اور یہ حدیث ایک اور سند کے ہمراہ بھی منقول ہے (جو کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3964]

عبدالعزیز بن جریر رضی اللہ عنہ کہتے ہیں: ہم نے ام المومنین سیدہ عائشہ رضی اللہ عنہا سے پوچھا کہ رسول اللہ صلی اللہ علیہ وسلم وتر میں کیا پڑھا کرتے تھے؟ آپ نے فرمایا: آپ پہلی رکعت میں سورۃ (سَبِّحِ اسْمَ رَبِّکَ الْاَعْلَی) دوسری میں (قُلْ یٰٓاَیُّھَا الْکٰفِرُوْنَ) اور تیسری میں (قُلْ ھُوَ اللّٰہُ اَحَدٌ) اور معوذتین پڑھا کرتے تھے۔ ٭٭ حدیث اور روایت کے امام الوقت سیدنا سعید بن کثیر بن عفیر نے اس کو یحیی بن ایوب سے روایت کیا ہے۔ میں نے کتاب الوتر کی املا کے وقت اسی حدیث کو ڈھونڈا لیکن اس وقت نہ مل سکی لیکن اس کے بعد مل گئی تھی۔ [المستدرك على الصحيحين/كِتَابُ التَّفْسِيرِ/حدیث: 3965]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم وتر کی پہلی دو رکعتوں میں سورۃ ” اعلیٰ “ اور سورۃ ” کافرون “ پڑھا کرتے تھے اور آخری رکعت میں سورۃ ” اخلاص “ سورۃ ” فلق “ اور سورۃ ” ناس “ پڑھا کرتے تھے۔ [المستدرك على الصحيحين/كِتَابُ التَّفْسِيرِ/حدیث: 3966]

سیدنا عبداللہ بن عمر رضی اللہ عنہما کے بارے میں مروی ہے کہ آپ جب (سَبِّحِ اسْمَ رَبِّکَ الْاَعْلَی) پڑھتے تو کہتے:” سُبْحَانَ رِبِّیَ الْاَعْلٰی الَّذِیْ خَلَقَ فَسَوّٰی “ (پاک ہے میرا وہ بلند رب جس نے درست تخلیق فرمائی) یہ سیدنا ابی بن کعب رضی اللہ عنہ کی قراءت ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3967]

سیدنا سعد بن ابی وقاص رضی اللہ عنہ جب (سَبِّحِ اسْمَ رَبِّکَ الْاَعْلَی) پڑھتے تو کہتے: سَنُقْرِئُکَ فَلَا تَنْسٰٓی (ہم عنقریب تمہیں پڑھائیں گے پھر تم اسے نہ بھولو گے) آپ بھولنے کے خوف کی وجہ سے قرآن پاک یاد کرتے رہتے تھے (قاسم بن ربیعہ) کہتے ہیں: میں نے سعد رضی اللہ عنہ کو یوں پڑھتے سنا ” مَا نَنْسَخْ مِنْ آيَةٍ أَوْ نُنْسِهَا “ مں نے کہا: سعید بن مسیب رضی اللہ عنہ اس کو ” اَوْ نَنْسَاھَا “ پڑھا کرتے تھے۔ تو سیدنا سعد رضی اللہ عنہ نے جواباً کہا: قرآن مسیب پر اور اس کی آل پر نازل نہیں ہوا۔ اللہ تعالیٰ فرماتا ہے: سَنُقْرِئُکَ فَلَا تَنْسٰٓی اور فرمایا: وَاذْکُرْ رَّبَّکَ اِذَا نَسِیْتَ (اور اپنے رب کو یاد کرو جب بھول جاؤ) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3968]