سیدنا نعمان بن بشیر رضی اللہ عنہ فرماتے ہیں: سیدنا عبداللہ بن رواحہ رضی اللہ عنہ پر غشی طاری ہوئی تو ان کی بہن بین کرتے ہوئے واویلا کرنے لگ گئی، جب ان کو افاقہ ہوا تو فرمایا: تو نے جو جو کچھ بولا، اس سب کے متعلق مجھ سے پوچھا گیا کہ تو واقعی ایسا ہے؟ کیا تو واقعی ایسا ہے؟ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4401]

عبداللہ بن بریدہ اپنے والد کا یہ بیان نقل کرتے ہیں: نبی اکرم صلی اللہ علیہ وسلم نے غزوہ ذات السلاسل میں سیدنا عمرو بن العاص رضی اللہ عنہ کو (امیر بنا کر) بھیجا، اس مہم میں سیدنا ابوبکر رضی اللہ عنہ اور سیدنا عمر رضی اللہ عنہ بھی شریک تھے، جب یہ لوگ جنگ کے میدان تک پہنچے تو سیدنا عمرو رضی اللہ عنہ نے ان لوگوں کو یہ ہدایت کی کہ وہ آگ نہ جلائیں، اس بات پر سیدنا عمر رضی اللہ عنہ کو غصہ آ گیا اور وہ سیدنا عمرو بن العاص رضی اللہ عنہ کے ساتھ الجھنے لگے تو سیدنا ابوبکر رضی اللہ عنہ نے انہیں ایسا کرنے سے روکا اور انہیں سمجھایا نبی اکرم صلی اللہ علیہ وسلم نے انہیں تمہارا امیر اسی لیے مقرر کیا ہے کیونکہ وہ جنگ کے بارے میں (زیادہ بہتر) جانتے ہیں۔ تو سیدنا عمر رضی اللہ عنہ رک گئے۔ یہ حدیث سند کے اعتبار سے صحیح ہے تاہم شیخین نے اسے نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4402]

عامر بن عبداللہ بیان کرتے ہیں، سیّدہ ام سلمہ نے سیدنا سلمہ بن ہشام بن مغیرہ رضی اللہ عنہ کی اہلیہ سے دریافت کیا: کیا وجہ ہے کہ میں نے سلمہ رضی اللہ عنہ کو نبی اکرم صلی اللہ علیہ وسلم اور مسلمانوں کے ساتھ باجماعت نماز ادا کرتے ہوئے نہیں دیکھا تو اس خاتون نے جواب دیا: اللہ کہ قسم! وہ اس وجہ سے (گھر سے) باہر نہیں نکلتے کہ وہ جب بھی باہر آتے ہیں تو لوگ انہیں بلند آواز میں کہتے ہیں: اے فرار ہونے والے! کیا تم اللہ کی راہ میں (جہاد کرنے) سے فرار ہوئے تھے، تو وہ اپنے گھر میں ہی بیٹھے ہوئے ہیں اور باہر نہیں نکلتے۔ (راوی کہتے ہیں:) انہوں نے غزوہ موتہ میں سیدنا خالد بن ولید رضی اللہ عنہ کے ساتھ شرکت کی تھی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4403]

سیدنا ابوہریرہ رضی اللہ عنہ فرماتے ہیں: میرے چچا زاد بھائی اور میرے درمیان کچھ ناراضگی تھی۔ اس نے کہا:” مگر تیرا جنگ موتہ سے بھاگنا “ (کیا معنی رکھتا ہے؟) تو مجھے سمجھ نہیں آ رہی تھی کہ میں اس کو کیا جواب دوں۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4404]