سیدنا سعد رضی اللہ عنہ فرماتے ہیں: فتح مکہ کے دن عبداللہ بن ابی سرح رضی اللہ عنہ سیدنا عثمان بن عفان رضی اللہ عنہ کے پاس جا کر چھپ گئے۔ سیدنا عثمان رضی اللہ عنہ ان کو لے کر نبی اکرم صلی اللہ علیہ وسلم کی خدمت میں حاضر ہو گئے اور عرض کی: یا رسول اللہ صلی اللہ علیہ وسلم عبداللہ کی بیعت لے لیجئے۔ نبی اکرم صلی اللہ علیہ وسلم نے تین مرتبہ سر اٹھا کر اس کی طرف دیکھا پھر آپ نے اپنے صحابہ رضی اللہ عنہم کی طرف متوجہ ہو کر فرمایا: کیا تم میں کوئی سمجھدار آدمی نہیں ہے؟ جب اس نے دیکھ لیا تھا کہ میں اس کی بیعت سے پہلو تہی کر رہا ہوں تو وہ اٹھ کر اس کو مار دیتا۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ہمیں پتہ نہیں چل سکا تھا کہ آپ کے دل میں کیا ارادہ ہے۔ آپ ہمیں آنکھ سے اشارہ فرما دیتے۔ آپ صلی اللہ علیہ وسلم نے فرمایا: کسی نبی کی شان کے لائق نہیں ہے کہ اس کی آنکھ خائن ہو۔ ٭٭ یہ حدیث امام مسلم کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4408]

سیدنا عبداللہ بن عباس رضی اللہ عنہما فرماتے ہیں: سیدنا عبداللہ بن ابی سرح رضی اللہ عنہ، رسول اللہ صلی اللہ علیہ وسلم کے (ہاں وحی کی کتابت کے لئے) کاتب تھے۔ پھر یہ مرتد ہو کر کفار سے جا ملے تھے۔ رسول اللہ صلی اللہ علیہ وسلم نے اس کو قتل کرنے کا حکم فرما دیا تھا۔ پھر سیدنا عثمان رضی اللہ عنہ نے ان کے لئے امان مانگی تو رسول اللہ صلی اللہ علیہ وسلم نے ان کو امان دے دی تھی۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4409]

سیدنا شرحبیل بن سعد رضی اللہ عنہ فرماتے ہیں: یہ آیت سیدنا عبداللہ بن ابی سرح کے بارے میں نازل ہوئی وَمَنْ اَظْلَمُ مِمَّنِ افْتَرَی عَلَی اللّٰہِ کَذِبًا اُوْحِیَ اِلَیَّ وَلَمْ یُوْحَ اِلَیْہِ شَیْئٌ وَمَنْ قَالَ سَاُنْزِلُ مِثْلَ مَا اَنْزَلَ اللّٰہُ (الانعام: 93) ” اور اس سے بڑھ کر ظالم کون جو اللہ پر جھوٹ باندھے یا کہے مجھے وحی ہوئی اور اسے کچھ وحی نہ ہوئی اور جو کہے ابھی میں اتارتا ہوں ایسا جیسا خدا نے اتارا “ جب رسول اللہ صلی اللہ علیہ وسلم (فتح مکہ کے موقع پر) مکہ میں داخل ہوئے تو وہ سیدنا عثمان رضی اللہ عنہ کے پاس بھاگ گیا کیونکہ وہ سیدنا عثمان کا رضاعی بھائی بھی تھا۔ سیدنا عثمان رضی اللہ عنہ نے اس کو چھپائے رکھا حتی کہ جب مکہ میں امن ہو گیا تو سیدنا عثمان رضی اللہ عنہ نے اس کو رسول اللہ صلی اللہ علیہ وسلم کی بارگاہ میں پیش کر دیا اور اس کے لئے امان کی سفارش کی۔ ٭٭ نوٹ: امام حاکم کہتے ہیں: بخاری اور مسلم میں یہ صحیح روایات موجود ہیں کہ رسول اللہ صلی اللہ علیہ وسلم نے مکہ میں داخل ہونے سے پہلے عبداللہ بن سعد اور عبداللہ بن خطل کے قتل کا حکم دیا تھا۔ اس لئے جس آدمی کی نظر سیدنا عثمان بن عفان رضی اللہ عنہ کی شہادت اور عبداللہ بن سعد کی مصر میں ان کے خلاف حرکتوں پر ہے، وہ جانتا ہے کہ نبی اکرم صلی اللہ علیہ وسلم کو اسی وقت اس (کی حرکتوں) کا پتہ تھا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4410]