سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: میں علم کا شہر ہوں، علی اس کا دروازہ ہے۔ اس لئے جو شہر میں آنا چاہے وہ دروازے سے آئے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4687]

عباس بن محمد الدوری کہتے ہیں: میں نے سیدنا یحیی بن معین سے ابوصلت ہروی کے بارے میں پوچھا تو انہوں نے کہا: وہ ثقہ ہے۔ میں نے کہا: کیا اس نے ابومعاویہ کے واسطے سے اعمش سے یہ روایت نہیں کی ” انا مدینۃ العلم “ تو انہوں نے کہا: اس کو محمد بن جعفر الفیدی نے بھی روایت کیا ہے اور وہ ثقہ ہیں، مامون ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4687M1]

ابونصر احمد بن سہل الفقیہ القبانی جو اپنے زمانے میں بخارا میں امام (فی الحدیث) رہے ہیں، فرماتے ہیں: صالح بن محمد بن حبیب الحافظ سے ” ابوصلت “ کے بارے میں پوچھا گیا تو انہوں نے کہا: یحیی بن معین ابوصلت کے پاس گئے، اس وقت بھی یحیی بن معین کے ہمراہ تھے۔ انہوں نے ابوصلت کو سلام کیا، پھر جب وہ وہاں سے نکلے تو میں بھی ان کے پیچھے نکل آیا۔ میں نے ان سے کہا: ابوصلت کے بارے میں آپ کی کیا رائے ہے؟ انہوں نے کہا: وہ صدوق ہیں۔ میں نے کہا: وہ تو اعمش کے واسطے سے مجاہد کے حوالے سے سیدنا عبداللہ بن عباس رضی اللہ عنہما کی روایت بیان کرتے ہیں کہ نبی اکرم صلی اللہ علیہ وسلم نے ارشاد فرمایا:” میں علم کا شہر ہوں اور علی اس کا دروازہ ہے، اس لئے جو علم چاہتا ہو، وہ اس تک اس کے دروازے سے آئے۔ انہوں نے کہا: یہی حدیث ابوصلت کی طرح الفیدی نے ابومعاویہ کے واسطے سے اعمش سے روایت کی ہے۔ (ان کی روایت کردہ حدیث درج ذیل ہے) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4687M2]

سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: میں علم کا شہر ہوں اور علی اس کا دروازہ ہے، اس لئے جو شہر میں آنا چاہے وہ دروازے سے آئے۔ ٭٭ حسین بن فہم کہتے ہیں: ہمیں یہ حدیث ابوصلت الہروی نے ابومعاویہ کے حوالے سے بیان کی ہے۔ امام حاکم کہتے ہیں: اس علم سے دلچسپی رکھنے والے کو پتا ہونا چاہئے کہ حسین بن فہم بن عبدالرحمن ثقہ ہیں، مامون ہیں اور حافظ ہیں۔ ٭٭ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4688]

سند صحیح کے ہمراہ سفیان ثوری سے مروی درج ذیل حدیث مذکورہ حدیث کی شاہد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4688M]

مذکورہ سند کے ہمراہ سیدنا جابر بن عبداللہ رضی اللہ عنہ کا یہ ارشاد منقول ہے کہ رسول اللہ صلی اللہ علیہ وسلم نے ارشادہ فرمایا: میں علم کا شہر ہوں اور علی اس کا دروازہ ہے۔ اس لئے جو شہر میں آنا چاہے وہ دروازے سے آئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4689]