سیدنا مسور بن مخرمہ رضی اللہ عنہ سے روایت ہے کہ حسن بن حسن (بن علی) نے ان کی صاحبزادی کا رشتہ مانگا، تو مسور رضی اللہ عنہ نے انہیں عشاء کے وقت ملنے کا کہا، جب وہ ملے تو مسور نے اللہ کی حمد و ثنا بیان کی اور پھر فرمایا: اما بعد! اللہ کی قسم، میرے نزدیک آپ کے نسب، تعلق اور دامادی سے بڑھ کر کوئی رشتہ محبوب نہیں، لیکن رسول اللہ صلی اللہ علیہ وسلم نے فرمایا تھا: ”فاطمہ میرا ایک ٹکڑا ہے، جس بات سے اسے تنگی ہو اس سے مجھے تنگی ہوتی ہے اور جس سے اسے خوشی ہو اس سے مجھے خوشی ہوتی ہے، اور قیامت کے دن میرے نسب، تعلق اور دامادی کے علاوہ تمام رشتے منقطع ہو جائیں گے“، جبکہ آپ کے پاس ان کی صاحبزادی (سیدہ فاطمہ رضی اللہ عنہا کی پوتی) نکاح میں موجود ہے، اور اگر میں نے اپنی بیٹی کا نکاح بھی آپ سے کر دیا تو اس سے انہیں (سیدہ فاطمہ رضی اللہ عنہا کو) تکلیف پہنچے گی؛ چنانچہ وہ معذرت کرتے ہوئے واپس چلے گئے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4802]