ام المومنین سیدہ عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نے اپنی مرض الموت میں فرمایا: اے فاطمہ! کیا تم اس بات پر راضی نہیں ہو کہ تم تمام جنتی عورتوں، اس امت کی تمام عورتوں اور تمام مومنین کی عورتوں کی سردار ہو؟ ٭٭ یہ سند صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس طرح نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4794]

سیدنا (عبداللہ) بن بریدہ اپنے والد (بریدہ رضی اللہ عنہ) سے روایت کرتے ہیں کہ انہوں نے فرمایا: ”رسول اللہ صلی اللہ علیہ وسلم کو عورتوں میں سب سے زیادہ محبوب فاطمہ (سلام اللہ علیہا) تھیں، اور مردوں میں علی (رضی اللہ عنہ) تھے“۔ امام حاکم فرماتے ہیں: اس حدیث کی سند صحیح ہے، مگر شیخین (بخاری و مسلم) نے اسے تخریج نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4795]

سیدنا ابوہریرہ رضی اللہ عنہ بیان کرتے ہیں: سیدہ فاطمہ رضی اللہ عنہا نبی اکرم صلی اللہ علیہ وسلم کی خدمت میں خادم مانگنے کے لئے آئیں تو آپ صلی اللہ علیہ وسلم نے ان سے فرمایا: تم جس چیز کا مجھ سے مطالبہ کرنے کے لئے آئی ہو تمہیں وہ چیز زیادہ عزیز ہے یا تمہارے نزدیک اس سے بھی زیادہ عزیز کوئی چیز ہے؟ (سیدنا ابوہریرہ رضی اللہ عنہ) فرماتے ہیں: میں سمجھ گیا کہ وہ سیدنا علی رضی اللہ عنہ کے لئے مانگنے آئی تھیں، آپ صلی اللہ علیہ وسلم نے فرمایا: یہ دعا مانگا کرو ” اے اللہ، اے آسمانوں اور عرش عظیم کے مالک، ہمارے رب اور ہر چیز کے رب، تورات، انجیل اور قرآن پاک نازل فرمانے والے، اے دانے اور گٹھلی کو چیرنے والے، میں ہر اس چیز کے شر سے تیری پناہ مانگتا ہوں جس کا قبضہ تیرے ہاتھ میں ہے، تو اول ہے تجھ سے پہلے کچھ نہیں، تو آخر ہے تیرے بعد کچھ نہیں، تو ظاہر ہے تجھ سے بڑھ کر کچھ نہیں اور تو باطن ہے تیرے سوا کچھ نہیں، تو ہمارا قرضہ ادا فرما اور ہمیں فقر سے بے نیاز فرما “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4796]

سیدہ فاطمہ رضی اللہ عنہا فرماتی ہیں: مشرکین مکہ کا ایک مکان میں اجلاس ہو رہا تھا، رسول اللہ صلی اللہ علیہ وسلم نے مجھ سے فرمایا: بیٹی! یہیں ٹھہرے رہنا ہے۔ پھر آپ چلے گئے اور آپ مسجد میں ان کے پاس چلے گئے ان لوگوں نے سر اٹھا کر ایک بار دیکھا پھر سر جھکا لئے، آپ صلی اللہ علیہ وسلم نے ایک مٹھی مٹی لے کر ان جانب پھینک دی پھر فرمایا: شاہت الوجوہ (خدا کرے کہ یہ چہرے قبیح ہو جائیں)۔ اس دن جس شخص پر بھی یہ مٹی پڑی وہ بدر کے دن مارا گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4797]

سیدہ ام ایمن رضی اللہ عنہا فرماتی ہیں: رسول اللہ صلی اللہ علیہ وسلم نے اپنی بیٹی کا نکاح سیدنا علی رضی اللہ عنہ کے ساتھ کیا اور سیدنا علی رضی اللہ عنہ سے فرمایا: جب تک میں نہ آ جاؤں تم آپس میں کوئی بات نہ کرنا (اس کے بعد پوری حدیث بیان کی) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4798]

سیدنا جمیع بن عمیر رضی اللہ عنہ فرماتے ہیں: میں اپنی پھوپھی کے ہمراہ ام المومنین سیدہ عائشہ رضی اللہ عنہا کے پاس گیا میں نے ان سے پوچھا: رسول اللہ صلی اللہ علیہ وسلم کو سب سے زیادہ کون محبوب تھا؟ انہوں نے جواب دیا: فاطمہ رضی اللہ عنہا۔ ان سے پوچھا گیا: مردوں میں سے؟ انہوں نے فرمایا: ان کے شوہر۔ میں نے ان کو روزہ دار اور شب زندہ دار پایا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4799]

سیدنا انس رضی اللہ عنہ فرماتے ہیں: نبی اکرم صلی اللہ علیہ وسلم نے فرمایا: تجھے کائنات کی عورتوں میں سے چار عورتیں کافی ہیں۔ (1) مریم بنت عمران۔ (2) آسیہ زوجہ فرعون۔ (3) خدیجہ بنت خویلد۔ (4) فاطمہ بنت محمد۔ ٭٭ مسند امام احمد بن حنبل میں یہ روایت اسی طرح موجود ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4800]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: کائنات کی عورتوں میں سے تجھے چار عورتیں کافی ہیں۔ (1) مریم بنت عمران۔ (2) آسیہ زوجہ فرعون۔ (3) خدیجہ بنت خویلد۔ (4) فاطمہ بنت محمد۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو ان الفاظ کے ہمراہ بیان نہیں کیا اور حضور صلی اللہ علیہ وسلم کا یہ فرمان ” تجھے عالمین کی عورتوں میں سے کافی ہیں “ یہ دنیا کی عورتوں کو بھی شامل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4801]