سعید بن ابی سعید مقبری سے روایت ہے، انہوں نے کہا: ہم سیدنا ابوہریرہ رضی اللہ عنہ کے ساتھ تھے کہ اتنے میں سیدنا حسن بن علی بن ابی طالب رضی اللہ عنہما تشریف لائے اور سلام کیا، ہم نے ان کے سلام کا جواب دیا مگر سیدنا ابوہریرہ رضی اللہ عنہ کو ان کے آنے کا علم نہ ہوا، ہم نے ان سے عرض کیا: اے ابوہریرہ! یہ حسن بن علی ہیں جنہوں نے ہمیں سلام کیا ہے، پس وہ ان کے پیچھے لپکے اور کہا: ”وعلیک السلام اے میرے سردار“، پھر فرمایا: میں نے رسول اللہ صلی اللہ علیہ وسلم کو فرماتے سنا ہے کہ: ”بے شک یہ سردار ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4848]

سیدنا عروہ بن زبیر اپنے والد سے روایت کرتے ہیں کہ رسول اللہ صلی اللہ علیہ وسلم نے حسن رضی اللہ عنہ کا بوسہ لیا، انہیں اپنے سینے سے لگایا اور انہیں سونگھنے لگے، آپ صلی اللہ علیہ وسلم کے پاس انصار کا ایک شخص بیٹھا تھا، اس انصاری نے کہا: میرا ایک بیٹا ہے جو جوان ہو چکا ہے لیکن میں نے کبھی اس کا بوسہ نہیں لیا، تو رسول اللہ صلی اللہ علیہ وسلم نے ارشاد فرمایا: ”تمہارا کیا خیال ہے کہ اگر اللہ نے تمہارے دل سے رحمت نکال لی ہو تو اس میں میرا کیا قصور ہے؟“
یہ حدیث شیخین کی شرط پر صحیح الاسناد ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4849]

سیدنا ابن عباس رضی اللہ عنہما سے روایت ہے، انہوں نے کہا: نبی کریم صلی اللہ علیہ وسلم تشریف لائے جبکہ آپ صلی اللہ علیہ وسلم نے سیدنا حسن بن علی رضی اللہ عنہما کو اپنے کندھے پر اٹھایا ہوا تھا، ایک شخص آپ صلی اللہ علیہ وسلم سے ملا اور کہنے لگا: اے لڑکے! تم کتنی بہترین سواری پر سوار ہو، تو رسول اللہ صلی اللہ علیہ وسلم نے ارشاد فرمایا: ”اور کتنا بہترین سوار ہے یہ!“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4850]