سیدنا سعید بن ابی سعید رضی اللہ عنہ فرماتے ہیں: ہم سیدنا ابوہریرہ رضی اللہ عنہ کے ہمراہ تھے کہ سیدنا حسن بن علی ابن ابی طالب رضی اللہ عنہما ہمارے پاس تشریف لائے، انہوں نے آتے ہی سلام کیا، ہم نے ان کے سلام کا جواب دیا، سیدنا ابوہریرہ رضی اللہ عنہ کو ان کے آنے کا علم نہ ہوا۔ ہم نے ان کو بتایا کہ حسن بن علی رضی اللہ عنہما سلام کہہ رہے ہیں چنانچہ سیدنا ابوہریرہ رضی اللہ عنہ ان سے ملے اور ان کو سلام کا یوں جواب دیا ” وعلیک السلام یا سیدی “ پھر بولے: رسول اللہ صلی اللہ علیہ وسلم نے فرمایا ہے کہ ” یہ سید ہیں “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4848]

سیدنا عروہ بن الزبیر اپنے والد کا یہ بیان نقل کرتے ہیں کہ ” رسول اللہ صلی اللہ علیہ وسلم نے سیدنا حسن رضی اللہ عنہ کو چوم کر سینے سے لگا لیا اور ان کی خوشبو سونگھنے لگے، اس وقت آپ کے پاس ایک انصاری صحابی موجود تھے (حضور صلی اللہ علیہ وسلم کی اس قدر شفقت دیکھ کر وہ) بولے: میرا ایک بیٹا ہے جو اب بالغ ہو چکا ہے میں نے آج تک اس کو کبھی نہیں چوما، رسول اللہ صلی اللہ علیہ وسلم نے فرمایا: اگر اللہ تعالیٰ نے تیرے دل سے رحمت کے جذبات نہیں رکھے تو اس میں ہمارا کیا قصور ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4849]

سیدنا عبداللہ بن عباس رضی اللہ عنہما فرماتے ہیں: (ایک دفعہ) نبی اکرم صلی اللہ علیہ وسلم سیدنا حسن رضی اللہ عنہ کو اپنے کاندھوں پر بٹھائے ہوئے ہمارے پاس تشریف لائے۔ راستے میں ایک آدمی سے آپ کی ملاقات ہوئی وہ کہنے لگا: اے بچے! تیری سواری کتنی اچھی ہے جس پر تو سوار ہے۔ رسول اللہ صلی اللہ علیہ وسلم نے فرمایا: سوار بھی کتنا اچھا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4850]