محمود بن لبید فرماتے ہیں کہ جب رسول اللہ صلی اللہ علیہ وسلم غزوہ احد کے لئے روانہ ہوئے تو حذیفہ کے والد یمان بن جابر اور ثابت بن وقش بن زعوراء کو بلند مضبوط مکانوں میں عورتوں اور بچوں کی نگرانی کے لئے مقرر کیا گیا۔ ان میں سے ایک نے اپنے ساتھی سے کہا: (یہ دونوں عمر رسیدہ تھے) ہمارا بھی کوئی حال نہیں ہے، ہم کب تک انتظار کرتے رہیں گے۔ ہماری تھوڑی سی تو عمر باقی بچی ہے جبکہ ہم اپنی قوم کے سردار ہیں کیوں نہ ہم اپنی تلواریں پکڑیں اور رسول اللہ صلی اللہ علیہ وسلم کے ہمراہ جہاد میں شریک ہوں، چنانچہ یہ دونوں جا کر مسلمانوں کے لشکر میں شریک ہو گئے، جبکہ مسلمان مجاہدین ان کو جانتے نہ تھے۔ سیدنا ثابت بن وقش رضی اللہ عنہما کو مشرکین نے شہید کر دیا اور سیدنا حذیفہ کے والد، مسلم مجاہدین کے ہاتھوں شہید ہو گئے، کیونکہ یہ لوگ ان کو جانتے نہ تھے اس لئے لاعلمی میں مجاہدین نے ان کو شہید کر ڈالا، سیدنا حذیفہ رضی اللہ عنہ کہا: یہ میرے والد ہیں، یہ میرے والد ہیں۔ مجاہدین نے جواب دیا: ہم نے ان کو پہچانا نہیں تھا، اور ان کی یہ بات سچ تھی (انہوں نے واقعی ان کو نہیں پہچانا تھا) سیدنا حذیفہ رضی اللہ عنہ نے کہا: اللہ تعالیٰ تمہاری مغفرت فرمائے اور وہ سب سے بڑا رحم کرنے والا ہے۔ رسول اللہ صلی اللہ علیہ وسلم نے ان کی دیت ادا کرنا چاہی، لیکن سیدنا حذیفہ رضی اللہ عنہ نے وہ دیت بھی مسلمانوں پر صدقہ کر دی۔ ان کے اس عمل کی وجہ سے رسول اللہ صلی اللہ علیہ وسلم کی نظر میں ان کا مقام اور بھی بڑھ گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4970]

ان کی کنیت ابو جابر تھی، اور وہ سیدنا ابو جابر بن عبد اللہ سلمی انصاری رضی اللہ عنہ ہیں، وہ ان نقباء میں سے تھے جنہوں نے لیلۃُ العقبہ میں بیعت کی، اور غزوۂ اُحد کے دن مسلمانوں میں سب سے پہلے شہید کیے جانے والے تھے۔ انہیں سفیان بن عبد شمس ابو الاعور سلمی نے شہید کیا، اور رسول اللہ صلی اللہ علیہ وآلہ وسلم نے شکست سے پہلے ان کی نمازِ جنازہ ادا فرمائی۔ رضی اللہ عنہ۔ یہ تمام باتیں مجھے ابو عبد اللہ الاصبہانی نے بیان کیں، انہوں نے کہا: ہم سے حسن بن الجہم نے روایت کی، انہوں نے کہا: ہم سے حسین بن الفرج نے بیان کیا، انہوں نے کہا: ہم سے محمد بن عمر نے اپنے شیوخ سے روایت کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4971]