سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: گزشتہ رات سیدنا جعفر فرشتوں کے ہمراہ میرے پاس سے گزرے ان کے دونوں پروں خون کے سرخ رنگ سے رنگے ہوئے تھے اور دل سفید تھا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5008]

سیدنا جابر رضی اللہ عنہ بیان کرتے ہیں کہ: ”رسول اللہ صلی اللہ علیہ وسلم نے (غزوہ) بدر کے دن سیدنا جعفر بن ابی طالب رضی اللہ عنہ کے لیے (مالِ غنیمت میں سے) ان کا حصہ اور (آخرت کا) اجر مقرر فرمایا“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5009]

سیدنا (عبداللہ) بن عمر رضی اللہ عنہما فرماتے ہیں: ہم جنگ موتہ میں سیدنا جعفر بن ابی طالب رضی اللہ عنہ کے ہمراہ تھے۔ (جنگ کے بعد ان کو ڈھونڈا گیا تو ان کا جسم) شہداء میں ملا، اور ان کے جسم پر ستر سے زیادہ زخم تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5010]

سیدنا عبداللہ بن عباس رضی اللہ عنہما فرماتے ہیں: ایک مرتبہ ہم رسول اللہ صلی اللہ علیہ وسلم کے ہمراہ بیٹھے ہوئے تھے اور سیدہ اسماء بنت عمیس رضی اللہ عنہا حضور صلی اللہ علیہ وسلم کے بالکل قریب بیٹھی ہوئی تھیں، حضور صلی اللہ علیہ وسلم نے ہاتھ کا اشارہ کرتے ہوئے سلام کا جواب دیا پھر فرمایا: اے اسماء! یہ سیدنا جعفر بن ابی طالب رضی اللہ عنہ تھے جو کہ سیدنا جبرائیل علیہ السلام اور سیدنا میکائیل علیہ السلام کے ہمراہ جا رہے تھے انہوں نے ہمیں سلام کہا ہے، اس لئے ان کے سلام کا جواب دو، اور یہاں سے گزرنے کے تین یا چار دن پہلے کی مشرکین کے ساتھ جنگ کی صورت حال بھی مجھے بتائی ہے، (جعفر رضی اللہ عنہ نے مجھے بتایا کہ) میری مشرکین کے ساتھ مڈبھیڑ ہو گئی میرے جسم کی اگلی جانب تلواروں، نیزوں اور تیروں کے ستر سے زیادہ رخم لگے ہیں۔ میں نے اپنے دائیں ہاتھ میں علم بلند کیا ہوا تھا، میرا یہ ہاتھ کٹ گیا، پھر میں نے بائیں ہاتھ میں علم اٹھا لیا، پھر یہ ہاتھ بھی کٹ گیا۔ تو اللہ تعالیٰ نے میرے ان دونوں ہاتھوں کے بدلے دو پر عطا فرمائے ہیں، میں ان کی مدد سے جنت میں سیدنا جبرائیل علیہ السلام اور سیدنا میکائیل علیہ السلام کے ہمراہ جہاں چاہوں اڑ کر چلا جاتا ہوں اور جہاں سے چاہوں، جنت کے پھل کھاتا ہوں۔ سیدہ اسماء رضی اللہ عنہا نے عرض کی: اللہ تعالیٰ نے سیدنا جعفر رضی اللہ عنہ کو جو نعمتیں عطا فرمائی ہیں وہ ان کو مبارک ہوں، پھر رسول اللہ صلی اللہ علیہ وسلم نے منبر شریف پر رونق افروز ہو کر لوگوں کو بھی اس بات کی اطلاع عطا فرمائی۔ چنانچہ رسول اللہ صلی اللہ علیہ وسلم کے بیان کر دینے کے بعد لوگوں کو اس بات کا پتا چلا۔ اسی وجہ سے ان کو جعفر ” طیار “ (اڑنے والے) کہا جاتا ہے۔ سیدنا جابر رضی اللہ عنہ فرماتے ہیں: رسول اللہ صلی اللہ علیہ وسلم نے سیدنا جعفر رضی اللہ عنہ کے لئے جنگ بدر کا حصہ بھی رکھا تھا اور بدر میں شرکت کا ثواب بھی عطا فرمایا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5011]