سیدنا علی بن ابی طالب رضی اللہ عنہ سے سیدنا حمزہ رضی اللہ عنہ کی صاحبزادی کے بارے میں مروی ہے کہ سیدنا جعفر رضی اللہ عنہ نے کہا: میں اس (کی کفالت) کا زیادہ مستحق ہوں کیونکہ اس کی خالہ بھی میرے پاس ہے۔ تو رسول اللہ صلی اللہ علیہ وسلم نے فرمایا: جعفر رضی اللہ عنہ! تم صورت و سیرت میں بالکل میرے جیسے ہو، اور تم بھی اسی درخت سے ہو جس سے میں ہوں (یعنی تیرا اور میرا شجرہ نسب بھی ایک ہی ہے) سیدنا علی رضی اللہ عنہ نے کہا: یا رسول اللہ صلی اللہ علیہ وسلم میں اس پر راضی ہوں، آپ اس بچی کا جعفر رضی اللہ عنہ کے حق میں فیصلہ فرما دیجئے کیونکہ اس کی خالہ ان کے پاس ہے۔ اور خالہ ماں ہی (کی طرح) ہوتی ہے۔ تو سیدنا ابوہریرہ رضی اللہ عنہ فرمایا کرتے تھے: رسول اللہ صلی اللہ علیہ وسلم نے جب سیدنا جعفر رضی اللہ عنہ کو یہ کہا کہ ” صورت اور سیرت میں تم بالکل میرے جیسے ہو “ اس پر سیدنا جعفر رضی اللہ عنہ کے چہرے پر جو خوشی کے آثار نظر آئے، رسول اللہ صلی اللہ علیہ وسلم کے بعد مجھے انہی کے چہرے پر سب سے زیادہ اچھے لگے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5003]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ہم بنی عبدالمطلب جنتی لوگوں کے سردار ہیں۔ میں، علی، جعفر، حسن، حسین اور مہدی (رضی اللہ عنہم اجمعین) ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5004]

سیدنا جابر رضی اللہ عنہ فرماتے ہیں: جب رسول اللہ صلی اللہ علیہ وسلم غزوہ خیبر سے واپس تشریف لائے تو سیدنا جعفر رضی اللہ عنہ حبشہ سے واپس آئے، رسول اللہ صلی اللہ علیہ وسلم نے ان کا استقبال کیا، ان کے چہرے کا بوسہ لیا، پھر فرمایا: خدا کی قسم! میں نہیں جانتا کہ فتح خیبر کی مجھے زیادہ خوشی ہوئی ہے یا جعفر رضی اللہ عنہ کے آنے کی۔ "٭٭ اسی حدیث کو درج ذیل سند کے ہمراہ اسماعیل بن ابی خالد اور زکریا بن ابی زائدہ نے مرسلاً روایت کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5005]

جس کے بارے میں ہمیں علی بن عیسیٰ الحیری نے بیان کیا، وہ کہتے ہیں کہ ہمیں ابراہیم بن ابی طالب نے بیان کیا، وہ کہتے ہیں کہ ہمیں ابن ابی عمر نے بیان کیا، وہ کہتے ہیں کہ ہمیں سفیان نے ابن ابی خالد اور زکریا کے واسطے سے، انہوں نے شعبی سے روایت کی کہ انہوں نے کہا: رسول اللہ صلی اللہ علیہ وسلم خیبر سے تشریف لائے... پھر (راوی نے پوری) حدیث ذکر کی۔ یہ حدیث صحیح ہے، لیکن اس جیسی صحیح سند کے ساتھ یہ مرسل (تابعی سے براہِ راست مروی) ظاہر ہوئی ہے، اور اسے اجلح بن عبداللہ نے (صحابی کے ذکر کے ساتھ) موصولاً بیان کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5006]

سیدنا ابوموسیٰ رضی اللہ عنہ فرماتے ہیں: سیدنا عمر رضی اللہ عنہ سیدہ اسماء بنت عمیس رضی اللہ عنہا سے ملے، اور کہا: تم بہت اچھے لوگ ہو، اگر تم نے ہجرت ہم سے پہلے نہ کی ہوتی تو ہم لوگ تم سے بہتر ہوتے۔ ہم رسول اللہ صلی اللہ علیہ وسلم کی معیت میں ہوتے تھے، تمہارے پیدل لوگوں کو سواری پر بٹھاتے اور ان پڑھوں کو تعلیم دیتے تھے، اس طرح ہم نے اپنے دین کو مضبوط کر لیا۔ انہوں نے جواباً فرمایا: میں اب رسول اللہ صلی اللہ علیہ وسلم کے پاس جائے بغیر واپس نہیں لوٹوں گی، پھر وہ رسول اللہ صلی اللہ علیہ وسلم کے پاس گئیں، اور سیدنا عمر رضی اللہ عنہ سے ملاقات اور ان سے گفتگو کی مکمل تفصیل کہہ سنائی، تو رسول اللہ صلی اللہ علیہ وسلم نے ارشاد فرمایا: کیوں نہیں، تم نے دو ہجرتیں کی ہیں ایک ہجرت حبشہ کی طرف اور دوسری مدینہ منورہ کی طرف۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5007]