سیدنا اسامہ بن زید رضی اللہ عنہ فرماتے ہیں: حارثہ بن شراحیل نے بنی نبہان کی ایک خاتون سے شادی کی، ان میں سے جبلہ، اسماء اور زید پیدا ہوئے، پھر وہ خاتون فوت ہو گئیں، اور انہوں نے اپنی یہ اولاد ان کے دادا کی پرورش میں چھوڑی تھی، جبکہ حارثہ کی خواہش تھی کہ ان کے بچے انہی کی پرورش میں رہیں، چنانچہ وہ ان کے دادا کے پاس آئے (اور مدعا بیان کیا) انہوں نے کہا: ہمارے پاس جو کچھ ہے، وہ ان کے لئے بہتر ہے (یعنی ہمارے پاس ان کو کوئی تکلیف نہیں ہو گی) پھر یہ لوگ اس بات پر رضامند ہو گئے (کہ جبلہ اور اسماء کو ان کے والد حارثہ لے جائیں گے اور زید اپنے دادا کے پاس رہیں گے) چنانچہ فیصلہ کے مطابق جبلہ اور اسماء کو ان کے والد لے گئے اور زید اپنے دادا کے پاس رہ گئے۔ پھر تہامہ کی طرف سے بنی فزارہ میں سے ایک قبیلہ وہاں آیا، انہوں نے قبیلہ ” طی “ پر حملہ کر دیا، اس میں سیدنا زید بھی قیدی ہوئے، وہ لوگ ان کو عکاظ بازار میں لے آئے، نبی اکرم صلی اللہ علیہ وسلم نے ان کو دیکھ لیا (یہ حضور صلی اللہ علیہ وسلم کے اعلان نبوت سے پہلے کی بات ہے) آپ صلی اللہ علیہ وسلم نے سیدہ خدیجہ رضی اللہ عنہا سے فرمایا: اے خدیجہ! میں نے بازار میں ایک غلام دیکھا ہے پھر آپ صلی اللہ علیہ وسلم نے ان کے حسن و جمال، اس کی عقل و تمیز کی صفات بیان فرمائیں، اور فرمایا: اگر میرے پاس مال ہوتا تو میں یہ غلام خرید لیتا۔ سیدہ خدیجہ رضی اللہ عنہا نے سیدنا ورقہ بن نوفل کو حکم دیا، انہوں نے سیدہ خدیجہ رضی اللہ عنہا کے مال سے سیدنا زید رضی اللہ عنہ کو خرید لیا، رسول اللہ صلی اللہ علیہ وسلم نے فرمایا: اے خدیجہ رضی اللہ عنہا! تم اپنی خوشدلی کے ساتھ یہ غلام مجھے تحفہ دے دو، سیدہ خدیجہ رضی اللہ عنہا نے عرض کی: یا رسول اللہ صلی اللہ علیہ وسلم یہ غلام بہت حسین و جمیل ہے مجھے خدشہ ہے کہ آپ اس کو آگے بیچ دیں گے یا کسی کو تحفہ دے دیں گے، رسول اللہ صلی اللہ علیہ وسلم نے فرمایا: نہیں نہیں۔ میں تو اس کو اپنا بیٹا بنانا چاہتا ہوں، ام المومنین سیدہ خدیجہ رضی اللہ عنہا نے حامی بھر لی۔ پھر رسول اللہ صلی اللہ علیہ وسلم نے ان کی پرورش کی اور ان کو اپنا منہ بولا بیٹا بنا لیا۔ اس وجہ سے ان کو زید بن محمد کہا جانے لگا۔ بعد میں ان کے علاقے سے ایک آدمی وہاں پر آیا، اس نے سیدنا زید بن حارثہ کو پہچان لیا، وہ بولا: کیا تم زید بن حارثہ (رضی اللہ عنہ) ہو؟ انہوں نے کہا: نہیں، بلکہ میں زید بن محمد ہوں۔ اس آدمی نے کہا: نہیں۔ بلکہ تم زید بن حارثہ رضی اللہ عنہ ہو پھر اس نے ان کے والد کی، ان کے چچاؤں اور مامؤوں کی حالت بیان کی اور بتایا کہ انہوں نے تجھے ڈھونڈنے میں بہت مال خرچ کر ڈالا اور بے چارے تمہیں ڈھونڈتے ڈھونڈتے تھک گئے ہیں، تو سیدنا زید رضی اللہ عنہ نے جواب میں درج ذیل اشعار پڑھے۔ * میں اگرچہ اپنی قوم سے دور ہوں لیکن پھر بھی ان سے محبت رکھتا ہوں، اور حج کے موسم میں، میں اس گھرانے کا خدمت گزار ہوتا ہوں۔ * اور تم اس شخص سے بچ کر رہو جس نے تمہیں زخمی کیا ہے اور زمین میں جانوروں جیسے اعمال مت سیکھو۔ * کیونکہ اللہ کے فضل سے میں سب سے افضل خاندان میں موجود ہوں جو کہ پشت در پشت سردار چلے آ رہے ہیں۔ پھر جب وہ آدمی حارثہ کے پاس پہنچا (زید کے مل جانے کی خبر سنائی تو سیدنا حارثہ نے درج ذیل اشعار کہے۔ * میں زید پر رویا، مجھے معلوم نہ تھا کہ وہ زندہ ہے (کیونکہ اگر وہ زندہ ہے) تو اس سے ملنے کی امید رکھیں، یا وہ فوت ہو گیا ہے۔ * خدا کی قسم مجھے نہیں معلوم، میں تو سائل ہوں کہ تجھے کوئی زمین راس آ گئی ہے یا تجھے کسی پہاڑ نے نگل لیا ہے۔ * کاش کہ مجھے یہ پتا چل جائے کہ زمانے میں کبھی تو لوٹ آئے گا، تو اس زمانے میں مجھے تیرے آنے کی امید سے بڑھ کر اور کچھ نہیں چاہئے۔ تو مجھے سورج کے طلوع ہونے کے وقت بھی یاد آتا ہے جب بچہ رات کو روتا ہے۔ * جب ہوائیں چلتی ہیں تو اس کی یاد اور بھی بڑھ جاتی ہے۔ ہائے افسوس کہ میرا غم کتنا زیادہ اور کتنا طویل ہے۔ * میں اس کو ڈھونڈنے میں اپنی زندگی صرف کر دوں گا، انتھک محنت کروں گا اور تروتازہ گھاس روند ڈالوں گا۔ * پھر وہ خود میرے پاس آ جائے یا مجھے موت آ جائے، اور شخص نے مرنا تو ہے اگرچہ اس کو اس کی امیدوں نے دھوکے میں ڈال رکھا ہو۔ سیدنا حارثہ رضی اللہ عنہ اپنے اعزاء و اقرباء سمیت مکہ شریف میں آئے، فنائے کعبہ میں رسول اللہ صلی اللہ علیہ وسلم کے پاس آئے، اس وقت حضور صلی اللہ علیہ وسلم کے ہمراہ کافی سارے صحابہ کرام رضی اللہ عنہم موجود تھے، ان میں سیدنا زید بن حارثہ رضی اللہ عنہ بھی تھے، جب ان لوگوں نے سیدنا زید کو دیکھا تو پہچان لیا اور سیدنا زید نے ان کو پہچان لیا لیکن بارگاہ رسالت مآب صلی اللہ علیہ وسلم کے احترام کی وجہ سے اٹھ کر ان کی جانب نہ گئے، ان لوگوں نے سیدنا زید رضی اللہ عنہ کو بہت آوازیں دیں، لیکن آپ رضی اللہ عنہ نے ان کو کوئی جواب نہ دیا۔ نبی اکرم صلی اللہ علیہ وسلم نے سیدنا زید رضی اللہ عنہ سے پوچھا: یہ کون لوگ ہیں؟ سیدنا زید نے کہا: یا رسول اللہ صلی اللہ علیہ وسلم یہ میرے والد صاحب ہیں، یہ میرے چچا ہیں، یہ میرے بھائی ہیں، یہ میرا پورا خاندان ہے۔ نبی اکرم صلی اللہ علیہ وسلم نے فرمایا: ان کے لئے اٹھو اور ان کو سلام کرو، پھر سیدنا زید رضی اللہ عنہ نے کھڑے ہو کر ان کو سلام کیا، اور انہوں نے ان سے سلام کیا۔ پھر وہ لوگ کہنے لگے: اے زید تم ہمارے ساتھ چلو۔ سیدنا زید رضی اللہ عنہ نے جواباً کہا: میں رسول اللہ صلی اللہ علیہ وسلم کے علاوہ کسی کے ساتھ نہیں رہنا چاہتا۔ پھر ان لوگوں نے رسول اللہ صلی اللہ علیہ وسلم کی خدمت میں عرض کی: اے محمد ( صلی اللہ علیہ وسلم ) ہم آپ کو اس غلام کے بدلے ہر طرح کی قیمت دے سکتے ہیں آپ ہم سے جو بھی مطالبہ کریں گے ہم آپ کی خدمت میں پیش کر دیں گے۔ رسول اللہ صلی اللہ علیہ وسلم نے فرمایا: ٹھیک ہے تم لوگ اس بات کی گواہی دو کہ اللہ کے سوا کوئی عبادت کے لائق نہیں ہے اور یہ کہ میں اللہ کا آخری نبی اور رسول ہوں اور اس نے مجھے تمہاری جانب رسول بنا کر بھیجا ہے۔ وہ لوگ نہ مانے اور کہنے لگے: ہم جو دینار وغیرہ آپ کو پیش کر رہے ہیں آپ صرف انہی کو قبول فرما لیں۔ رسول اللہ صلی اللہ علیہ وسلم نے فرمایا: یہاں یہ عادت نہیں ہے۔ میں نے زید کا معاملہ اسی کے سپرد کیا، یہ اگر جانا چاہتا ہے تو مجھے کوئی اعتراض نہیں ہے۔ وہ کہنے لگے ٹھیک ہے، اب اس سے بڑھ کر تو کوئی بات باقی نہیں بچتی۔ پھر وہ سیدنا زید رضی اللہ عنہ سے مخاطب ہو کر کہنے لگے: اے زید! محمد ( صلی اللہ علیہ وسلم ) نے تو اب اجازت دے دی ہے، اب تو آپ ہمارے ساتھ چلئے، سیدنا زید رضی اللہ عنہ نے ان کو جواباً کہا: دور ہٹ جاؤ، میں رسول اللہ صلی اللہ علیہ وسلم کا نہ تو کوئی بدل چاہتا ہوں اور نہ ان پر اپنے باپ، بیٹے اور کسی کو بھی ترجیح دیتا ہوں، ان لوگوں نے بہت کوشش کی، ان کو نرمی، شفقت اور پیار سے سمجھایا، بہت سبز باغ دکھائے، اور چکر دینے کے تمام جتن کر لئے۔ لیکن سیدنا زید رضی اللہ عنہ نے انکار کر دیا اور قسم کھا کر کہا کہ میں تمہارے ساتھ نہیں جاؤں گا۔ سیدنا حارثہ رضی اللہ عنہ نے کہا: جہاں تک میرا تعلق ہے تو میں تمہیں اپنی گارنٹی دے سکتا ہوں میں گواہی دیتا ہوں کہ اللہ کے سوا کوئی عبادت کے لائق نہیں اور محمد صلی اللہ علیہ وسلم اللہ کے بندے اور رسول ہیں۔ (ان کے والد نے اسلام قبول کر لیا) اور باقیوں نے انکار کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5012]

محمد بن عمر اپنے شیوخ کے حوالے سے بیان کرتے ہیں کہ حارثہ بن شراحیل جب اپنے بیٹے سیدنا زید رضی اللہ عنہ کو کھو بیٹھے تو روتے ہوئے کہنے لگے: میں تو زید کے بارے میں رو رہا ہوں لیکن مجھے اس کے حال کا کوئی پتا نہیں ہے پھر اس کے بعد تفصیلی قصہ بیان کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5013]

سیدنا زید بن حارثہ رضی اللہ عنہ کے بھائی سیدنا جبلہ بن حارثہ فرماتے ہیں: میں نبی اکرم صلی اللہ علیہ وسلم کی خدمت میں حاضر ہوا اور عرض کی: یا رسول اللہ صلی اللہ علیہ وسلم میرے بھائی زید رضی اللہ عنہ کو میرے ساتھ بھیج دیں، آپ صلی اللہ علیہ وسلم نے فرمایا: زید وہ ہے، وہ اگر تمہارے ساتھ جانا چاہے تو میں ہرگز منع نہیں کروں گا، سیدنا زید رضی اللہ عنہ بولے: نہیں، یا رسول اللہ صلی اللہ علیہ وسلم میں آپ پر کسی کو بھی ترجیح نہیں دے سکتا۔ سیدنا جبلہ رضی اللہ عنہ فرماتے ہیں: میرے بھائی کی رائے میری رائے سے بہتر تھی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور یہ حدیث گزشتہ حدیث کی شاہد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5014]