سیدنا علی بن عیسیٰ نوفلی رضی اللہ عنہ فرماتے ہیں: سیدنا نوفل بن حارث رضی اللہ عنہ کو جنگ بدر کے موقع پر جب قید کیا گیا تو رسول اللہ صلی اللہ علیہ وسلم نے ان سے کہا: تم اپنا فدیہ ادا کرو۔ انہوں نے کہا: یا رسول اللہ صلی اللہ علیہ وسلم میرے پاس فدیہ میں دینے کے لئے کچھ بھی نہیں ہے۔ آپ علیہ نے فرمایا تم اپنی جان کے فدیہ میں وہ نیزے پیش کر دو جن کی تعداد سینکڑوں میں ہے۔ انہوں نے کہا: یہ بات تو اللہ کے بعد میرے سوا کوئی جانتا ہی نہیں تھا کہ میرے پاس اتنی بڑی تعداد میں نیزے موجود ہیں۔ (ان پر اسلام کی حقانیت آشکار ہو گئی اور انہوں نے کہا) میں گواہی دیتا ہوں کہ بے شک آپ اللہ کے رسول ہیں۔ تو انہوں نے اپنی جان کے فدیے میں وہ نیزے دیئے اور ان کی تعداد ایک ہزار تھی۔ (راوی) کہتے ہیں: رسول اللہ صلی اللہ علیہ وسلم نے سیدنا نوفل رضی اللہ عنہ اور سیدنا عباس بن عبدالمطلب رضی اللہ عنہ کو بھائی بھائی بنایا تھا اور یہ زمانہ جاہلیت میں ایک دوسرے کے ساتھ بہت محبت کرتے تھے اور دونوں نے شراکت پر کاروبار بھی کر رکھا تھا۔ سیدنا نوفل بن عبدالمطلب رضی اللہ عنہ نے رسول اللہ صلی اللہ علیہ وسلم کے ہمراہ فتح مکہ، جنگ حنین، اور جنگ طائف میں شرکت کی۔ جنگ حنین کے دن رسول اللہ صلی اللہ علیہ وسلم کے ہمراہ ثابت قدمی کا مظاہرہ کیا۔ رسول اللہ صلی اللہ علیہ وسلم نے فرمایا: گویا کہ میں دیکھ رہا ہوں کہ تیرا نیزہ مشرکوں کی پیٹھوں کو تو توڑ رہا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5151]

سیدنا سعید بن حارث اپنے دادا سیدنا نوفل بن حارث رضی اللہ عنہ کے بارے میں بیان کرتے ہیں کہ انہوں نے رسول اللہ صلی اللہ علیہ وسلم سے اپنی شادی کے بارے میں مدد مانگی تو نبی اکرم صلی اللہ علیہ وسلم نے ایک خاتون کے ساتھ ان کی شادی کروا دی۔ رسول اللہ صلی اللہ علیہ وسلم نے ان کے لئے کچھ تلاش کیا لیکن اس وقت گھر میں کچھ بھی نہ تھا تو رسول اللہ صلی اللہ علیہ وسلم نے سیدنا ابورافع رضی اللہ عنہ اور سیدنا ابوایوب رضی اللہ عنہ کو اپنی زرہ دے کر ایک یہودی کے پاس بھیجا اور اس کے پاس یہ زرہ گروی رکھ کر تیس صاع جو لے کر آئے۔ نبی اکرم صلی اللہ علیہ وسلم نے یہ جو مجھے عطا فرما دیئے، ہم چھ ماہ تک ان میں سے نکال نکال کر کھاتے رہے، پھر ایک مرتبہ ہم نے ان کو ماپ لیا تو یہ ابھی تک اتنے ہی تھے جتنے رسول اللہ صلی اللہ علیہ وسلم نے اس میں ڈالے تھے (یعنی ابھی تک پورے تیس صاع موجود تھے) سیدنا نوفل رضی اللہ عنہ فرماتے ہیں: میں نے اس بات کا ذکر رسول اللہ صلی اللہ علیہ وسلم سے کیا تو آپ صلی اللہ علیہ وسلم نے فرمایا: اگر تم ان کو نہ ماپتے تو ساری زندگی کھاتے رہتے لیکن یہ ختم نہ ہوتے۔ اور ربیعہ بن حارث اور عبیدہ بن حارث جنگ بدر میں رسول اللہ صلی اللہ علیہ وسلم کے سامنے مارے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5152]