سیدنا ابوسعید مقبری فرماتے ہیں: جب سیدنا ابوعبیدہ رضی اللہ عنہ طاعون میں مبتلا ہوئے تو انہوں نے کہا: اے معاذ لوگوں کو نماز پڑھایئے، تو سیدنا معاذ رضی اللہ عنہ نے لوگوں کو نماز پڑھائی۔ پھر سیدنا ابوعبیدہ بن جراح رضی اللہ عنہ فوت ہو گئے تو سیدنا معاذ رضی اللہ عنہ نے لوگوں میں کھڑے ہو کر کہا: اے لوگو! اپنے رب کی بارگاہ میں اپنے گناہوں کی سچی توبہ کر لو کیونکہ جو بندہ توبہ کر کے اللہ تعالیٰ سے ملتا ہے اللہ تعالیٰ کے ذمہ کرم پر ہے کہ اس کی بخشش کر دے۔ پھر فرمایا: اے لوگو! تم ایک آدمی کی وجہ سے گھبرا گئے ہو، خدا کی قسم! میں نے آج تک ان سے زیادہ باحیا اور نیک، خیانت سے دور اور اچھی عاقبت کا طلبگار، لوگوں کو نصیحت کرنے والا انسان نہیں دیکھا، تم اس کے لئے اللہ تعالیٰ کی بارگاہ سے رحمت طلب کرو۔ اور ان کی نماز جنازہ کے لئے جمع ہو جاؤ۔ خدا کی قسم! تمہیں اس جیسے آدمی کے جنازے میں شرکت کا پھر کبھی موقع نہیں ملے گا۔ چنانچہ لوگ جمع ہو گئے، سیدنا ابوعبیدہ رضی اللہ عنہ کا جنازہ لایا گیا اور سیدنا معاذ رضی اللہ عنہ نے نماز جنازہ پڑھائی۔ جب ان کو (تدفین کے لئے) قبر کے پاس لایا گیا تو سیدنا معاذ بن جبل، سیدنا عمرو بن عاص، اور سیدنا ضحاک بن قیس رضی اللہ عنہم قبر میں اترے، جب ان کو لحد میں لٹا کر یہ لوگ باہر آ گئے اور ان پر مٹی ڈال دی گئی تو سیدنا معاذ بن جبل رضی اللہ عنہ کہنے لگے: اے ابوعبیدہ! آج میں تمہاری تعریف کروں گا اور میں جھوٹ نہیں بولوں گا کیونکہ مجھے ڈر ہے کہ جھوٹ بولنے کی وجہ سے اللہ تعالیٰ مجھے جھوٹوں میں شامل نہ فرما دے۔ (پھر سیدنا معاذ بن جبل رضی اللہ عنہ نے ان الفاظ میں سیدنا ابوعبیدہ رضی اللہ عنہ کی تعریف کی) اے معاذ میرے علم کے مطابق تمہارا شمار «الذَّاکِرِیْنَ اللّٰہَ کَثِیْرًا (الاحزاب: 34) اللہ تعالیٰ کا کثرت سے ذکر کرنے والے۔ میں اور اَلَّذِیْنَ یَمْشُوْنَ عَلَی الْاَرْضِ ھَوْنًا وَاِذَا خَطَبَھُمُ الْجَاھِلُوْنَ قَالُوْا سَلَامًا (الفرقان: 63) اور رحمن کے وہ بندے کہ زمین پر آہستہ چلتے ہیں اور جب جاہل ان سے بات کرتے ہیں تو کہتے ہیں بس سلام “۔ اور اَلَّذِیْنَ اِذَ اَنْفَقُوْا لَمْ یُسْرِفُوْا وَلَمْ یَقْتُرُوْا وَکَانَ بَیْنَ ذٰلِکَ قَواٰمًا (الفرقان: 67) ” جب وہ خرچ کرتے ہیں نہ حد سے بڑھیں اور نہ تنگی کریں اور ان دونوں کے بیچ اعتدال پر رہیں “۔ میں ہوتا ہے۔ اور آپ خدا کی قسم! ان منکسر المزاج عاجزی کرنے والوں میں سے ہیں جو یتیموں اور مسکینوں پر رحم کرتے ہیں اور غرور کرنے والوں اور متکبروں سے بغض رکھتے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5229]

سیدنا مالک بن یخامر سیدنا ابوعبیدہ رضی اللہ عنہ کی تعریف کرتے ہوئے فرماتے ہیں: آپ کمزور اور دبلے پتلے آدمی تھے، ہلکی ہلکی لمبی داڑھی تھی، کبڑے تھے اور ان کے اگلے دانت ٹوٹے ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5230]

سیدنا عروہ بن رویم فرماتے ہیں کہ سیدنا ابوعبیدہ بن جراح رضی اللہ عنہ اردن کے ایک علاقے فحل میں 18 ہجری کو فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5231]

سیدنا عروہ فرماتے ہیں: بنی حارث بن فہر میں سے جنگ بدر میں شریک ہونے والوں میں سیدنا ابوعبیدہ بن جراح رضی اللہ عنہ ہیں۔ جنگ بدر کے موقع پر ان کی عمر 41 سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5232]