مصعب بن عبداللہ زبیری کہتے ہیں کہ سعید بن عامر بن حذیم بن سلامان بن ربیعہ بن سعد بن جمح رضی اللہ عنہ ایک جلیل القدر صحابی تھے، سیدنا عمر رضی اللہ عنہ نے انہیں شام کے بعض لشکروں کا امیر (گورنر) مقرر فرمایا تھا اور ان کی وفات وہیں سنہ 20 ہجری میں اپنے عہدے کے دوران ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5335]

زید بن اسلم سے روایت ہے کہ سیدنا عمر رضی اللہ عنہ نے سیدنا سعید بن عامر بن حذیم رضی اللہ عنہ سے پوچھا: شام والے آپ سے اس قدر محبت کیوں کرتے ہیں؟ انہوں نے کہا: میں ان کے ساتھ مل کر جہاد کرتا ہوں اور ان کی غمخواری و برابری کرتا ہوں، تب عمر رضی اللہ عنہ نے انہیں دس ہزار (درہم) دیے تو انہوں نے واپس کر دیے اور کہا: میرے پاس غلام اور گھوڑے موجود ہیں اور میں اچھی حالت میں ہوں، میں چاہتا ہوں کہ میرا کام مسلمانوں کے لیے صدقہ (محض اللہ کی خاطر) رہے، سیدنا عمر نے فرمایا: ایسا نہ کرو، کیونکہ رسول اللہ صلی اللہ علیہ وسلم نے مجھے اس سے کم مال دیا تھا تو میں نے بھی وہی کہا تھا جو تم کہہ رہے ہو، تب آپ صلی اللہ علیہ وسلم نے مجھ سے فرمایا تھا: ”جب اللہ تمہیں ایسا مال عطا فرمائے جس کا تم نے سوال نہ کیا ہو اور نہ تمہارا نفس اس کا حریص ہو، تو اسے لے لیا کرو کیونکہ وہ اللہ کا دیا ہوا رزق ہے جو اس نے تمہیں عنایت فرمایا ہے۔“
انس بن مرثد بن ابی مرثد غنوی رضی اللہ عنہ کے مناقب کا ذکر۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5336]