عبدالرحمن بن ابی لیلیٰ اپنے والد سے روایت کرتے ہیں کہ سیدنا اسید بن حضیر رضی اللہ عنہ ایک خوش مزاج اور خوش طبع انسان تھے، ایک بار جب وہ رسول اللہ صلی اللہ علیہ وسلم کے پاس موجود لوگوں سے گفتگو کر رہے تھے اور انہیں ہنسا رہے تھے تو رسول اللہ صلی اللہ علیہ وسلم نے (بطورِ مزاح) ان کے پہلو میں انگلی ماری، اسید نے عرض کیا: ”آپ نے مجھے تکلیف پہنچائی“، آپ صلی اللہ علیہ وسلم نے فرمایا: ”تم بھی بدلہ لے لو“، انہوں نے عرض کیا: ”یا رسول اللہ! آپ نے قمیص پہن رکھی ہے جبکہ میرے جسم پر قمیص نہیں تھی (جب آپ نے مجھے مارا)“، راوی کہتے ہیں: تو رسول اللہ صلی اللہ علیہ وسلم نے اپنی قمیص مبارک اٹھا دی، اس پر اسید رضی اللہ عنہ آپ صلی اللہ علیہ وسلم سے لپٹ گئے اور آپ صلی اللہ علیہ وسلم کے پہلوؤں کو چومنے لگے، پھر عرض کیا: ”یا رسول اللہ! میرے ماں باپ آپ پر قربان ہوں، میں تو بس یہی چاہتا تھا۔“ جریر کی حصین سے روایت کے الفاظ یہی ہیں جبکہ ورقاء کی حدیث مختصر ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5344]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”اسید بن حضیر کیا ہی بہترین آدمی ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5345]