سیدنا ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اے ابو المنذر! تمہارے پاس اللہ کی کتاب میں سب سے عظیم آیت کون سی ہے؟“ میں نے عرض کی: ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة البقرة: 255] ، تو آپ صلی اللہ علیہ وسلم نے میرے سینے پر (تھپکی دیتے ہوئے) ہاتھ مارا اور فرمایا: ”اے ابو المنذر! تمہیں تمہارا علم مبارک ہو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5410]

جندب رضی اللہ عنہ بیان کرتے ہیں کہ میں علم کی طلب میں مدینہ منورہ حاضر ہوا اور مسجد میں داخل ہوا تو دیکھا کہ ایک شخص کے گرد لوگ جمع ہیں، میں نے پوچھا: یہ کون ہیں؟ لوگوں نے بتایا: یہ سیدنا ابی بن کعب رضی اللہ عنہ ہیں، جب وہ (مسجد سے) اٹھے تو میں ان کے پیچھے چل پڑا، وہ اپنے گھر میں داخل ہوئے تو میں نے دروازہ کھٹکھٹایا، وہ باہر تشریف لائے تو انہوں نے مجھے جھڑکا اور مجھ پر سختی کی، میں نے (دکھ کے عالم میں) قبلہ رخ ہو کر عرض کی: اے اللہ! ہم تیری بارگاہ میں ان (صاحبِ علم لوگوں) کی شکایت کرتے ہیں، ہم اپنا مال خرچ کرتے ہیں، اپنے جسموں کو تھکاتے ہیں اور علم کی تلاش میں اپنی سواریاں دوڑاتے ہوئے (دور دراز سے) آتے ہیں، لیکن جب ہم ان سے ملتے ہیں تو وہ ہمیں ناپسند کرتے ہیں، اس پر انہوں نے فرمایا: ”اگر تم نے مجھے جمعہ کے دن تک مہلت دی تو میں وہ سب کچھ بیان کر دوں گا جو میں نے رسول اللہ صلی اللہ علیہ وسلم سے سنا ہے اور میں اس معاملے میں کسی ملامت کرنے والے کی ملامت کی پروا نہیں کروں گا“، پھر جب جمعرات کا دن ہوا اور میں صبح سویرے نکلا تو دیکھا کہ راستے لوگوں سے کھچا کھچ بھرے ہوئے ہیں، میں نے پوچھا: آج لوگوں کو کیا ہوا ہے؟ انہوں نے کہا: شاید تم یہاں اجنبی ہو؟ میں نے کہا: جی ہاں، انہوں نے بتایا: مسلمانوں کے سردار سیدنا ابی بن کعب رضی اللہ عنہ وفات پا گئے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5411]