ابو سلمہ اور محمد بن ابراہیم تیمی بیان کرتے ہیں کہ سیدنا عمر بن خطاب رضی اللہ عنہ ایک شخص کے پاس سے گزرے جو یہ آیت تلاوت کر رہا تھا: ﴿وَالسَّابِقُونَ الْأَوَّلُونَ مِنَ الْمُهَاجِرِينَ وَالْأَنْصَارِ وَالَّذِينَ اتَّبَعُوهُمْ بِإِحْسَانٍ رَضِيَ اللَّهُ عَنْهُمْ وَرَضُوا عَنْهُ﴾ [سورة التوبة: 100] ، تو سیدنا عمر رضی اللہ عنہ وہاں رک گئے اور اسے اپنے پاس بلایا، جب وہ آیا تو عمر رضی اللہ عنہ نے پوچھا: ”تمہیں یہ آیت کس نے پڑھائی ہے؟“ اس نے جواب دیا: ”مجھے یہ ابی بن کعب رضی اللہ عنہ نے پڑھائی ہے“، تو عمر رضی اللہ عنہ نے فرمایا: ”ہمیں ان کے پاس لے چلو“، چنانچہ وہ ان کے پاس پہنچے تو دیکھا کہ وہ ایک تکیے سے ٹیک لگائے اپنے سر کے بالوں میں کنگھی کر رہے تھے، عمر رضی اللہ عنہ نے انہیں سلام کیا، انہوں نے جواب دیا، پھر عمر رضی اللہ عنہ نے پوچھا: ”اے ابو المنذر! کیا آپ نے اس شخص کو یہ آیت پڑھائی ہے؟“ انہوں نے فرمایا: ”جی ہاں، میں نے اسے براہِ راست رسول اللہ صلی اللہ علیہ وسلم سے حاصل کیا ہے“، عمر رضی اللہ عنہ نے پھر پوچھا: ”کیا واقعی آپ نے اسے رسول اللہ صلی اللہ علیہ وسلم سے سیکھا ہے؟“ انہوں نے کہا: ”ہاں، میں نے اسے رسول اللہ صلی اللہ علیہ وسلم سے حاصل کیا ہے“، تین مرتبہ یہی سوال ہوا، تیسری بار انہوں نے غضب ناک ہو کر فرمایا: ”ہاں، اللہ کی قسم! اللہ نے اسے جبرائیل پر اور جبرائیل نے محمد صلی اللہ علیہ وسلم پر نازل فرمایا ہے، اور اس وحی میں نہ تو خطاب سے کوئی مشورہ لیا گیا اور نہ ہی ان کے بیٹے سے“، یہ سن کر سیدنا عمر رضی اللہ عنہ ہاتھ بلند کر کے ”اللہ اکبر، اللہ اکبر“ پکارتے ہوئے باہر نکل آئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5413]

سیدنا سعید بن مسیب سے روایت ہے کہ جب سیدنا عمر بن خطاب رضی اللہ عنہ اس آیت ﴿الَّذِينَ آمَنُوا وَلَمْ يَلْبِسُوا إِيمَانَهُمْ بِظُلْمٍ﴾ [سورة الأنعام: 82] پر پہنچے تو انہوں نے سیدنا ابی بن کعب رضی اللہ عنہ سے آ کر پوچھا: ”ہم میں سے کون ایسا ہے جس نے (کبھی) ظلم نہ کیا ہو؟“ تو ابی بن کعب نے عرض کی: ”اے امیر المؤمنین! اس سے مراد شرک ہے، کیا آپ نے لقمان کا اپنے بیٹے سے وہ قول نہیں سنا: ﴿يَابُنَيَّ لَا تُشْرِكْ بِاللَّهِ إِنَّ الشِّرْكَ لَظُلْمٌ عَظِيمٌ﴾ ”اے میرے پیارے بیٹے! اللہ کے ساتھ شرک نہ کرنا، بے شک شرک بہت بڑا ظلم ہے۔“ [سورة لقمان: 13] ؟! [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5414]