معاویہ بن قرہ اپنے والد کا یہ بیان نقل کرتے ہیں: سیدنا عبداللہ بن مسعود رضی اللہ عنہ ایک درخت پر چڑھے ہوئے اپنے ساتھیوں کے لئے پھل توڑ رہے تھے، اس دوران ہوا چلی، جس کی وجہ سے ان کی پنڈلی ننگی ہو گئی، یہ دیکھ کر صحابہ کرام ہنس پڑے، رسول اللہ صلی اللہ علیہ وسلم نے فرمایا: اس ذات کی قسم جس کے قبضہ میں میری جان ہے، یہ میزان میں احد پہاڑ سے بھی زیادہ وزنی ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5470]

سیدنا علی رضی اللہ عنہ فرماتے ہیں: میں نبی اکرم صلی اللہ علیہ وسلم کے پاس تھا، اس وقت حضور صلی اللہ علیہ وسلم کے پاس سیدنا ابوبکر رضی اللہ عنہ اور کچھ دیگر صحابہ کرام رضی اللہ عنہم موجود تھے۔ ہم سیدنا عبداللہ بن مسعود رضی اللہ عنہ کے پاس سے گزرے، وہ اس وقت نماز پڑھ رہے تھے، نبی اکرم صلی اللہ علیہ وسلم نے پوچھا: یہ کون ہے؟ آپ کو بتایا گیا کہ یہ عبداللہ بن مسعود رضی اللہ عنہ ہیں، آپ صلی اللہ علیہ وسلم نے فرمایا: عبداللہ اسی انداز میں قرآن پڑھتا ہے جس انداز میں نازل ہوا۔ پھر حضور صلی اللہ علیہ وسلم نے اللہ تعالیٰ کی بارگاہ میں سیدنا عبداللہ بن مسعود رضی اللہ عنہ کی تعریف کی۔ اور ان کی خوب توصیف و ثناء کی، پھر ان کے لیے بہت احسن انداز میں دعا مانگی جس انداز میں ایک غلام اپنے آقا سے کوئی چیز مانگتا ہے۔ پھر کہا: اے اللہ میں تجھ سے ایسا ایمان مانگتا ہوں جس میں ارتداد نہ ہو، اور ایسی نعمتیں مانگتا ہوں جو ختم نہ ہوں۔ اور تیری جنت الفردوس کے اعلی علیین میں تیرے محبوب صلی اللہ علیہ وسلم کی سنگت مانگتا ہوں۔ اور رسول اللہ صلی اللہ علیہ وسلم نے ان کو کہا ”تم مانگو، تمہیں دیا جائے گا، تم مانگو تمہیں دیا جائے گا“ پھر میں ان کی خوشخبری دینے کے لئے چلا تو دیکھا کہ سیدنا ابوبکر رضی اللہ عنہ مجھ سے پہلے خوشخبری دے چکے تھے، اور سیدنا ابوبکر رضی اللہ عنہ نیکیوں میں سب سے آگے بڑھا کرتے تھے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5471]

سیدنا عبدالله فرماتے ہیں کہ رسول اللہ صلی اللہ علیہ وسلم نے ارشاد فرمایا ”میں اپنی امت کے لئے اسی چیز پر راضی ہوں جس چیز پر ام عبد کا بیٹا (یعنی سیدنا عبداللہ بن مسعود رضی اللہ عنہ) راضی ہے۔ ٭٭ یہ اسناد امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور اس میں کوئی علت موجود ہے۔ انہوں نے درج ذیل اسناد کے ہمراہ حدیث نقل کی ہے۔ فَأَخْبَرَنَا مُحَمَّدُ بْنُ مُوسَى بْنِ عِمْرَانَ الْفَقِيهُ، ثَنَا إِبْرَاهِيمُ بْنُ أَبِي طَالِبٍ، ثَنَا أَبُو كُرَيْبٍ، ثَنَا وَكِيعٌ، عَنْ سُفْيَانَ اور اسرائیل کی روایت کردہ حدیث درج ذیل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5472]

ہمیں محمد بن موسیٰ بن عمران الفقیہ نے بتایا، وہ کہتے ہیں کہ ہمیں ابراہیم بن ابی طالب نے بتایا، وہ کہتے ہیں کہ ہمیں ابو کریب نے بتایا، وہ کہتے ہیں کہ ہمیں وکیع نے سفیان (ثوری) کے واسطے سے بتایا؛ (یہ سفیان کی روایت ہے) اور رہی اسرائیل کی حدیث (تو اس کا ذکر آگے آئے گا)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5473]

قاسم بن عبدالرحمن فرماتے ہیں کہ رسول اللہ صلی اللہ علیہ وسلم نے ارشاد فرمایا: میں اپنی امت کے لئے اسی چیز پر راضی ہوں جس چیز پر ام عبد کا بیٹا راضی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5474]