سیدنا علی رضی اللہ عنہ سے روایت ہے کہ میں نبی کریم صلی اللہ علیہ وسلم کے ہمراہ تھا اور آپ کے ساتھ ابوبکر اور دیگر صحابہ بھی موجود تھے، ہمارا گزر عبد اللہ بن مسعود رضی اللہ عنہ کے پاس سے ہوا جبکہ وہ نماز پڑھ رہے تھے، تو نبی کریم صلی اللہ علیہ وسلم نے پوچھا: ”یہ کون ہے؟“ عرض کیا گیا: عبد اللہ بن مسعود، تو آپ صلی اللہ علیہ وسلم نے فرمایا: ”بے شک عبد اللہ قرآن کو ویسے ہی تر و تازہ پڑھتا ہے جیسے وہ نازل ہوا ہے“، پھر عبد اللہ نے اپنے رب کی ثنا اور حمد بیان کی اور بہت خوبصورتی سے اپنے رب کی حمد کی، پھر اللہ سے دعا مانگی اور بڑی جامع اور بہترین دعا کی جو کوئی بندہ اپنے رب سے مانگ سکتا ہے، انہوں نے عرض کی: «اللَّهُمَّ إِنِّي أسْأَلُكَ إيمَانًا لَا يَرْتَدُّ، وَنَعِيمًا لَا يَنْفَدُ، وَمُرَافَقَةَ مُحَمَّدٍ صلی اللہ علیہ وسلم فِي أعْلَى عِلِّيِّينَ فِي جِنَانِكَ جِنَانِ الْخُلْدِ» ”اے اللہ! میں تجھ سے ایسے ایمان کا سوال کرتا ہوں جو کبھی زائل نہ ہو، ایسی نعمت کا جو کبھی ختم نہ ہو، اور تیری دائمی جنتوں کے بلند ترین درجات میں محمد صلی اللہ علیہ وسلم کی رفاقت کا طالب ہوں۔“ راوی کہتے ہیں کہ اس دوران آپ صلی اللہ علیہ وسلم مسلسل فرما رہے تھے: ”مانگو، تمہیں عطا کیا جائے گا، مانگو، تمہیں عطا کیا جائے گا“، سیدنا علی رضی اللہ عنہ کہتے ہیں کہ میں انہیں یہ خوشخبری دینے کے لیے دوڑا تو دیکھا کہ ابوبکر رضی اللہ عنہ مجھ سے پہلے پہنچ چکے تھے اور وہ نیکیوں میں سبقت لے جانے والے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5471]

سیدنا عبد اللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں نے اپنی امت کے لیے وہی بات پسند کی ہے جو ابنِ امِ عبد (عبد اللہ بن مسعود) نے ان کے لیے پسند کی ہے۔“
یہ اسناد شیخین کی شرط پر صحیح ہے لیکن انہوں نے اسے روایت نہیں کیا، البتہ سفیان ثوری اور اسرائیل بن یونس کی منصور سے روایت کی وجہ سے اس میں ایک علت ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5472]

امام حاکم فرماتے ہیں کہ مذکورہ بالا حدیث سفیان ثوری نے بھی منصور سے روایت کی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5473]

اسرائیل بن یونس بھی منصور کے واسطے سے قاسم بن عبد الرحمن سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: ”میں نے اپنی امت کے لیے وہی پسند کیا ہے جو ان کے لیے ابنِ امِ عبد نے پسند کیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5474]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اگر میں کسی کو مشورے کے بغیر خلیفہ مقرر کرنے والا ہوتا تو ابنِ امِ عبد (عبد اللہ بن مسعود) کو ان پر خلیفہ بنا دیتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5475]