عبید اللہ بن ولید وصافی اپنے والد سے روایت کرتے ہیں کہ جب عمرو بن جرموز نے سیدنا زبیر بن عوام رضی اللہ عنہ کو شہید کیا تو ان کی زوجہ عاتکہ بنت زید بن عمرو بن نفیل رضی اللہ عنہا نے اشعار پڑھے —اور وہ ہجرت کرنے والی جلیل القدر خواتین میں سے تھیں— وہ کہہ رہی تھیں: ”ابن جرموز نے مقابلے کے دن ایک ایسے عظیم شہسوار کے ساتھ غداری کی جو میدان سے بھاگنے والا نہیں تھا۔ اے عمرو! اگر تم انہیں بیدار یا چوکنا کر دیتے تو تم انہیں ایسا پاتے کہ نہ ان کی انگلیاں کانپتیں اور نہ ہاتھ۔ تیری ماں تجھے روئے! کیا تو نے ماضی میں صبح و شام آنے جانے والوں میں سے ان جیسی کسی ہستی پر غلبہ پایا ہے؟ انہوں نے کتنے ہی کٹھن معرکوں میں شمولیت اختیار کی جن سے تمہارے جیسا بزدل انہیں ہٹا نہیں سکا“۔
طلحہ بن عبید اللہ تیمی رضی اللہ عنہ کے مناقب کا ذکر۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5682]

عروہ بن زبیر رضی اللہ عنہ سے روایت ہے کہ سیدنا طلحہ بن عبید اللہ بن عثمان بن عمرو بن کعب بن سعد بن تیم بن مرہ رضی اللہ عنہ ملک شام میں تھے (جب غزوہ بدر پیش آیا)، انہوں نے رسول اللہ صلی اللہ علیہ وسلم سے (مالِ غنیمت میں) اپنے حصے کے متعلق عرض کی تو آپ صلی اللہ علیہ وسلم نے ان کا حصہ مقرر فرما دیا، انہوں نے دریافت کیا: اے اللہ کے رسول صلی اللہ علیہ وسلم ! کیا مجھے اجر بھی ملے گا؟ آپ صلی اللہ علیہ وسلم نے فرمایا: ”اور تمہارا اجر بدر کے دن سے (ثابت) ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5683]

سیدنا عبداللہ بن عباس رضی اللہ عنہما سے روایت ہے، انہوں نے کہا: سیدنا ابوبکر صدیق، سیدنا عثمان، سیدنا طلحہ، سیدنا عمار بن یاسر، سیدنا عبدالرحمن بن عوف اور سیدنا زبیر رضی اللہ عنہم کی ماؤں نے اسلام قبول کیا، نیز سیدنا سعد رضی اللہ عنہ اور ان کی والدہ نے بھی (نبی کریم صلی اللہ علیہ وسلم کی) زندگی میں اسلام قبول کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5684]

ابن شہاب زہری سے روایت ہے کہ سیدنا طلحہ بن عبید اللہ بن عثمان بن عمرو بن کعب بن سعد بن تیم بن مرہ رضی اللہ عنہ نبی کریم صلی اللہ علیہ وسلم کی بدر سے واپسی کے بعد ملک شام سے تشریف لائے، انہوں نے نبی کریم صلی اللہ علیہ وسلم سے (مالِ غنیمت میں) اپنے حصے کے بارے میں کلام کیا تو نبی کریم صلی اللہ علیہ وسلم نے ان سے فرمایا: ”تمہارا حصہ تمہارے لیے (ثابت) ہے۔“ انہوں نے عرض کی: اے اللہ کے رسول صلی اللہ علیہ وسلم ! کیا میرا اجر بھی ہے؟ آپ صلی اللہ علیہ وسلم نے فرمایا: ”اور تمہارے لیے تمہارا اجر بھی ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5685]