محمد بن جریر کہتے ہیں: یہ موقف غلط ہے۔ میں اس موقف رکھنے والے کے بارے میں سمجھتا ہوں کہ یا تو اس کو سیدنا عثمان رضی اللہ عنہ کی شہادت کے وقت کا علم نہیں ہے یا پھر اس کو صحیح حساب نہیں کرنا آتا۔ اس کی وجہ یہ ہے کہ سیرت نگاروں کا اس بارے میں کوئی اختلاف نہیں ہے کہ سیدنا عثمان رضی اللہ عنہ کی شہادت سن 35 ہجری کے ماہ ذوالحجہ میں ہوئی تھی، ان میں سے ایک جماعت کا کہنا ہے کہ سیدنا عثمان رضی اللہ عنہ کی شہادت 18 ذوالحجہ کو ہوئی۔ (تاریخ کوئی بھی ہو بہرحال جب) ان کی شہادت ذوالحجہ میں ہوئی ہے اور سیدنا عثمان رضی اللہ عنہ کی شہادت کے بعد چالیس دن تک سیدنا حذیفہ رضی اللہ عنہ زندہ بھی رہے ہیں تو لازمی بات ہے کہ ان کی شہادت کا سال 36 ہجری بنتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5725]

بلال بن یحیی فرماتے ہیں: سیدنا حذیفہ رضی اللہ عنہ کی وفات کا وقت قریب آیا (آپ اس وقت تک سیدنا عثمان رضی اللہ عنہ کی شہادت کے بعد چالیس دن زندگی گزار چکے تھے) آپ نے ہمیں فرمایا: میں تمہیں اللہ تعالیٰ سے ڈرنے کی اور امیرالمومنین سیدنا علی ابن ابی طالب رضی اللہ عنہ کی اطاعت کی وصیت کرتا ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5726]

ربعی بن حراش فرماتے ہیں: ایک آدمی سیدنا حذیفہ رضی اللہ عنہ کے پاس آیا اور اس نے آپ کو ” ابوعبداللہ “ کی کنیت سے پکارا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5727]

قیس بن ابی حازم فرماتے ہیں: جب سیدنا حذیفہ رضی اللہ عنہ کا کفن لایا گیا اس وقت وہ سیدنا عبداللہ بن مسعود رضی اللہ عنہ کے ساتھ ٹیک لگائے ہوئے تھے، (راوی) کہتے ہیں: وہ کفن بالکل نیا تھا، آپ رضی اللہ عنہ نے فرمایا: اس کی کیا ضرورت ہے؟ اگر تمہارا ساتھی نیک ہوا تو اللہ تعالیٰ اس کو اچھے کفن میں بدل دے گا اور اگر نیک نہ ہوا تو یہی کفن قیامت کے دن منہ پر بھی مارا جا سکتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5728]

سیدنا ابومسعود انصاری رضی اللہ عنہ فرماتے ہیں: سیدنا حذیفہ رضی اللہ عنہ پر رات کے پہلے پہر میں غشی طاری ہوئی، لیکن یہ غشی رات کے پچھلے پہر ختم ہو گئی، جب افاقہ ہوا تو انہوں نے وقت پوچھا، میں نے کہا: سحری کا وقت ہے۔ انہوں نے دو یا تین مرتبہ جہنم سے اللہ تعالیٰ کی پناہ مانگی پھر فرمایا: میرے لئے صرف دو کپڑے خرید کر اس میں مجھے کفن دے دینا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5729]