ہاشم بن عتبہ بن ابی وقاص رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے ہوئے سنا ہے: ”مسلمان جزیرہ عرب پر غالب آئیں گے، اور مسلمان فارس پر غالب آئیں گے، اور مسلمان روم پر غالب آئیں گے، اور مسلمان کانے دجال پر بھی غالب آئیں گے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5795]

ابوبکر بن محمد بن عمرو بن حزم سے روایت ہے کہ جنگ صفین کے دن سیدنا علی بن ابی طالب رضی اللہ عنہ کے علمبردار ہاشم بن عتبہ بن ابی وقاص تھے، اور یہ وہی ہیں جو (اشعار میں) کہہ رہے تھے: ”یہ کانا (شخص) اپنے گھر والوں کے لیے (جنت کا) مقام تلاش کر رہا ہے، وہ زندگی کی تلخیوں کو جھیلتے ہوئے اکتا چکا ہے، اب اسے یا تو غلبہ پانا ہے یا پھر شہید ہونا ہے“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5796]

زفر بن حارث سے روایت ہے، انہوں نے کہا: میں جنگ صفین کے دوران سیدنا معاویہ رضی اللہ عنہ کا قاصد بن کر سیدہ عائشہ رضی اللہ عنہا کی خدمت میں حاضر ہوا، تو انہوں نے مجھ سے پوچھا: لوگوں میں سے کون کون قتل ہوا؟ میں نے کہا: عمار بن یاسر، تو سیدہ عائشہ رضی اللہ عنہا نے فرمایا: ”وہ تو ایسے پیشوا تھے کہ لوگ ان کے دین کی وجہ سے ان کی پیروی کرتے تھے“، پھر انہوں نے پوچھا: اور کون؟ میں نے کہا: ہاشم بن عتبہ بن ابی وقاص الاعور، تو انہوں نے فرمایا: ”وہ ایک ایسے مردِ میدان تھے کہ ان کی سواری کے قدم کبھی ڈگمگائے نہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5797]

محمد بن عمر بیان کرتے ہیں کہ ہاشم الاعور، عتبہ بن ابی وقاص بن اہیب بن عبدمناف بن زہرہ کے بیٹے تھے، انہوں نے فتح مکہ کے دن اسلام قبول کیا، وہ یک چشم (کانے) تھے، ان کی ایک آنکھ جنگ یرموک کے دن ضائع ہوئی تھی، وہ سیدنا سعد بن ابی وقاص رضی اللہ عنہ کے بھتیجے تھے، انہوں نے سیدنا علی بن ابی طالب رضی اللہ عنہ کے ہمراہ جنگ صفین میں شرکت کی اور وہ اس دن پیادہ دستے کے امیر تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5798]