محمد بن عبداللہ بن نمیر فرماتے ہیں: ابوسعید زید بن ثابت ضحاک 45 ہجری کو فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5887]

سیدنا زید بن ثابت رضی اللہ عنہ فرماتے ہیں: جب بعاث کا واقعہ رونما ہوا، اس وقت میری عمر 6 سال تھی، یہ بات رسول اللہ صلی اللہ علیہ وسلم کی ہجرت سے پانچ برس پہلے کی ہے۔ جب رسول اللہ صلی اللہ علیہ وسلم مدینہ منورہ تشریف لائے، اس وقت میری عمر 11 سال تھی۔ مجھے رسول اللہ صلی اللہ علیہ وسلم کی بارگاہ میں پیش کیا گیا، لوگوں نے کہا: یہ خزرج سے تعلق رکھنے والا بچہ ہے، اس نے 16 سورتیں یاد کر رکھی ہیں۔ (سیدنا زید) کہتے ہیں: مجھے نہ تو جنگ بدر میں شریک ہونے کی اجازت ملی اور نہ ہی جنگ احد میں، البتہ جنگ خندق میں جانے کی اجازت مل گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888]

سیدنا ابن عمر فرماتے ہیں: سیدنا زید بن ثابت رضی اللہ عنہ بیک وقت دو زبانوں میں لکھا کرتے تھے، عربی اور عبرانی میں۔ سیدنا زید بن ثابت رضی اللہ عنہ نے رسول اللہ صلی اللہ علیہ وسلم کے ہمراہ سب سے پہلے غزوہ خندق میں شرکت کی، اس وقت ان کی عمر 15 سال تھی۔ جنگ خندق کے موقع پر مٹی اٹھانے والوں میں یہ بھی شامل تھے۔ رسول اللہ صلی اللہ علیہ وسلم نے ان کے بارے میں فرمایا: یہ بچہ بہت اچھا ہے، اس دن ان پر نیند کا غلبہ ہو گیا تو وہ سو گئے، سیدنا عمارہ بن حزم آ کر ان کے ہتھیار لے گئے، لیکن ان کو کچھ پتا نہ چلا۔ رسول اللہ صلی اللہ علیہ وسلم نے فرمایا: اے ابورقاد! تم سو گئے تھے اور تمہارے ہتھیار ہتھیا لئے گئے۔ پھر رسول اللہ صلی اللہ علیہ وسلم نے فرمایا: اس بچے کے ہتھیاروں کا کسی کو پتا ہے؟ سیدنا عمارہ بن حزم رضی اللہ عنہ نے کہا: یا رسول اللہ صلی اللہ علیہ وسلم میرے پاس ہیں۔ رسول اللہ صلی اللہ علیہ وسلم نے منع فرمایا: کوئی مومن کسی مومن کو گھبراہٹ میں ڈالے اور یہ کہ اس کا مال و متاع ہنسی مذاق میں ہتھیا لے۔ سیدنا عمارہ رضی اللہ عنہ نے ان کا سامان سیدنا زید بن ثابت رضی اللہ عنہ کے سپرد کر دیا، غزوہ تبوک میں بنی مالک بن نجار کا علم سیدنا عمارہ بن حزم رضی اللہ عنہ کے پاس تھا، رسول اللہ صلی اللہ علیہ وسلم کو پتا چلا تو آپ علیہ السلام نے علم ان سے لے کر سیدنا زید بن ثابت رضی اللہ عنہ کے سپرد کر دیا، سیدنا عمارہ رضی اللہ عنہ نے عرض کی: یا رسول اللہ صلی اللہ علیہ وسلم کیا میری کوئی شکایت آپ تک پہنچی ہے؟ آپ علیہ السلام نے فرمایا نہیں، ایسی بات نہیں ہے۔ بلکہ قرآن کو مقدم کیا جاتا ہے زید بن ثابت رضی اللہ عنہ تم سے زیادہ اچھے طریقے سے قرآن کو محفوظ کرتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888M1]

ابن عمر کہتے ہیں: زید بن ثابت رضی اللہ عنہ کا جب انتقال ہوا تو اس وقت ان کے صاحبزادے سیدنا اسماعیل بہت چھوٹے تھے، انہوں نے ان سے کسی حدیث کا سماع نہیں کیا، اور ان کی وفات کے بارے میں روایات مختلف ہیں۔ ابن عمر کہتے ہیں: ہماری معلومات کے مطابق ان کی وفات 56 سال کی عمر میں سن 45 ہجری میں ہوئی۔ مروان بن حکم نے ان کی نماز جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888M2]