سیدنا زید بن ثابت رضی اللہ عنہ سے روایت ہے، انہوں نے کہا: جنگِ بعاث کے وقت میری عمر چھ برس تھی اور یہ واقعہ رسول اللہ صلی اللہ علیہ وسلم کی ہجرت سے پانچ سال پہلے کا ہے، پھر جب رسول اللہ صلی اللہ علیہ وسلم مدینہ تشریف لائے تو میں گیارہ سال کا تھا، مجھے آپ صلی اللہ علیہ وسلم کی خدمت میں لایا گیا اور لوگوں نے عرض کی: یہ قبیلہ خزرج کا ایک لڑکا ہے جس نے قرآن کی سولہ سورتیں پڑھ لی ہیں، مجھے غزوہ بدر اور احد میں (عمر کم ہونے کی بنا پر) شرکت کی اجازت نہیں ملی، تاہم غزوہ خندق میں شرکت کی اجازت دے دی گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888]

ابن عمر سے روایت ہے کہ سیدنا زید بن ثابت رضی اللہ عنہ عربی اور عبرانی دونوں تحریریں لکھ لیا کرتے تھے، اور پہلا غزوہ جس میں انہوں نے رسول اللہ صلی اللہ علیہ وسلم کے ساتھ شرکت کی وہ غزوہ خندق تھا جبکہ ان کی عمر پندرہ سال تھی، وہ اس دن مسلمانوں کے ساتھ مٹی اٹھا رہے تھے تو رسول اللہ صلی اللہ علیہ وسلم نے فرمایا: ”یہ کتنا ہی اچھا لڑکا ہے۔“ اس دن ان کی آنکھ لگ گئی اور وہ سو گئے تو عمارہ بن حزم آئے اور ان کا اسلحہ اٹھا لیا جبکہ انہیں خبر نہ ہوئی، رسول اللہ صلی اللہ علیہ وسلم نے ان سے فرمایا: ”اے بہت سونے والے (ابو رقاد)! تم سوئے رہے یہاں تک کہ تمہارا اسلحہ چلا گیا“، پھر آپ صلی اللہ علیہ وسلم نے پوچھا: ”اس لڑکے کے اسلحہ کے بارے میں کسی کو علم ہے؟“ عمارہ بن حزم نے عرض کی: یا رسول اللہ! وہ میرے پاس ہے، پھر انہوں نے وہ واپس کر دیا، تب رسول اللہ صلی اللہ علیہ وسلم نے کسی مومن کو ڈرانے اور مذاق یا سنجیدگی میں اس کا سامان لینے سے منع فرمایا۔ غزوہ تبوک میں بنو مالک بن نجار کا جھنڈا عمارہ بن حزم کے پاس تھا لیکن رسول اللہ صلی اللہ علیہ وسلم نے ان سے لے کر زید بن ثابت کو دے دیا، عمارہ نے عرض کی: یا رسول اللہ! کیا آپ کو میری کوئی شکایت ملی ہے؟ آپ صلی اللہ علیہ وسلم نے فرمایا: ”نہیں، لیکن قرآن کو مقدم رکھا جائے گا اور زید نے تم سے زیادہ قرآن حاصل کیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888M1]

ابن عمر رضی اللہ عنہما سے روایت ہے کہ سیدنا زید بن ثابت رضی اللہ عنہ کا جب انتقال ہوا تو ان کے بیٹے اسماعیل چھوٹے تھے اور انہوں نے اپنے والد سے کچھ نہیں سنا۔ ان کی وفات کے وقت میں اختلاف ہے، ہمارے نزدیک وہ مدینہ منورہ میں سن 45 ہجری میں فوت ہوئے جبکہ ان کی عمر چھپن سال تھی اور مروان بن حکم نے ان کی نمازِ جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5888M2]

علی بن مدینی سے روایت ہے کہ سیدنا زید بن ثابت رضی اللہ عنہ کی وفات سن 44 یا 45 ہجری میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5889]