سیدنا ابوموسیٰ اشعری رضی اللہ عنہ سے روایت ہے کہ ایک رات نبی کریم صلی اللہ علیہ وسلم کا ان کے پاس سے گزر ہوا جبکہ سیدہ عائشہ رضی اللہ عنہا بھی آپ صلی اللہ علیہ وسلم کے ہمراہ تھیں، ابوموسیٰ قرآن کی تلاوت کر رہے تھے، آپ صلی اللہ علیہ وسلم کھڑے ہو گئے اور ان کی تلاوت سننے لگے، پھر آگے تشریف لے گئے، جب صبح ہوئی اور ابوموسیٰ رضی اللہ عنہ نبی کریم صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے فرمایا: ”اے ابوموسیٰ! کل رات میرا تمہارے پاس سے گزر ہوا تھا جبکہ تم تلاوت کر رہے تھے، پس ہم تمہاری قرأت سننے کے لیے رک گئے تھے“، سیدنا ابوموسیٰ رضی اللہ عنہ نے عرض کیا: ”اے اللہ کے نبی! اگر مجھے آپ کی موجودگی کا علم ہوتا تو میں آپ کے لیے (قرآن کو) اور زیادہ سجا کر اور خوبصورت آواز میں تلاوت کرتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6079]

ابوبردہ سے روایت ہے کہ سیدنا ابن عمر رضی اللہ عنہما نے مجھ سے پوچھا: ”کیا تم جانتے ہو کہ میرے والد (عمر) نے تمہارے والد (ابوموسیٰ) سے کیا کہا تھا؟“ میں نے کہا: نہیں، انہوں نے کہا: میرے والد نے تمہارے والد سے پوچھا تھا: ”کیا تمہیں یہ بات خوش کرتی ہے کہ رسول اللہ صلی اللہ علیہ وسلم کے ساتھ ہمارا اسلام لانا، ہجرت کرنا، جہاد کرنا اور تمام اعمال ہمارے لیے محفوظ رہ جاتے اور اس کے بعد ہم نے جو بھی عمل کیا ہوتا اس سے ہم اس طرح نجات پا جاتے کہ نہ ہمیں ثواب ملتا اور نہ گناہ (یعنی برابر چھوٹ جاتے)؟“ تمہارے والد نے میرے والد سے کہا: ”نہیں اللہ کی قسم! ہم نے رسول اللہ صلی اللہ علیہ وسلم کے بعد جہاد کیا، نمازیں پڑھیں، روزے رکھے اور بہت سی بھلائیاں کیں، اور ہمیں (اللہ سے) اس کے اجر کی امید ہے“، ابن عمر رضی اللہ عنہما کہتے ہیں کہ اس پر میرے والد نے تمہارے والد سے فرمایا: ”اس ذات کی قسم جس کے قبضے میں میری جان ہے! میری تو یہ خواہش ہے کہ وہ ابتدائی اعمال میرے لیے محفوظ رہ جاتے اور اس کے بعد کی ہر چیز سے میں برابر سرابر چھوٹ جاتا (تاکہ کوئی حساب نہ رہے)“، ابوبردہ کہتے ہیں کہ میں نے (ابن عمر سے) کہا: ”بے شک آپ کے والد میرے والد سے بہتر تھے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6080]