سیدنا عبداللہ بن عباس رضی اللہ عنہما فرماتے ہیں کہ نبی اکرم صلی اللہ علیہ وسلم نے سمندر کی جہادی مہم میں سیدنا ابوموسیٰ اشعری رضی اللہ عنہ کو سپہ سالار بنا دیا، یہ لوگ کشتی میں تھے اور کشتی سمندر میں سفر کر رہی تھی کہ رات کے وقت کسی نے ندا دی ” خبردار! کیا میں تمہیں اس فیـصلے کی خبر نہ دوں جو اللہ تعالیٰ نے خود اپنے بارے میں کر رکھا ہے، خبردار! وہ فیصلہ یہ ہے کہ جو شخص گرمی کے ایام میں ایک دن اللہ کی رضا کے لئے پیاس برداشت کرے گا (یعنی روزہ رکھے گا)، اللہ تعالیٰ پر یہ حق ہے کہ اس کو سب سے زیادہ پیاس والے دن پانی پلائے گا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6081]

سیدنا عروہ فرماتے ہیں کہ سیدنا معاویہ رضی اللہ عنہ نے اپنے بھائی عتبہ بن ابی سفیان کی وفات کے بعد سیدنا عقبہ بن عامر جہنی رضی اللہ عنہ کو مصر کا گورنر بنایا تھا۔ یہ بات 44 ہجری کی ہے۔ اسی سال سیدنا معاویہ نے حج قائم فرمایا۔ معروف بن خربوذ مکی فرماتے ہیں: ایک مرتبہ سیدنا عبداللہ بن عباس رضی اللہ عنہما مسجد میں بیٹھے ہوئے تھے اور ہم لوگ اس کے اردگرد موجود تھے، سیدنا معاویہ آئے اور ان کے پاس بیٹھ گئے، لیکن سیدنا عبداللہ بن عباس رضی اللہ عنہما نے ان سے منہ پھیر لیا، سیدنا معاویہ رضی اللہ عنہ نے منہ پھیرنے کی وجہ پوچھتے ہوئے کہا: کیا تم نہیں جانتے کہ تمہارے چچا زاد بھائی سے زیادہ اس منصب کا میں مستحق ہوں؟ سیدنا عبداللہ نے پوچھا: وہ کیسے؟ سیدنا معاویہ نے کہا: اس لئے نہیں کہ وہ مسلمان تھے اور میں کافر تھا۔ بلکہ اس لئے کہ میں سیدنا عثمان کے چچا کا بیٹا ہوں۔ سیدنا عبداللہ نے فرمایا: پھر بھی میرا چچا تمہارے چچا کے بیٹے سے بہتر ہے۔ انہوں نے کہا: سیدنا عثمان رضی اللہ عنہ کو ظلماً شہید کیا گیا حالانکہ اس وقت ان کے پاس سیدنا عمر کے دو بیٹے موجود تھے۔ سیدنا عبداللہ بن عباس رضی اللہ عنہما نے فرمایا: خدا کی قسم! وہ تم سے زیادہ اس منصب کا حقدار ہے۔ سیدنا معاویہ نے کہا: سیدنا عمر رضی اللہ عنہ کو ایک کافر نے شہید کیا جبکہ سیدنا عثمان کو مسلمان نے شہید کیا۔ سیدنا عبداللہ بن عباس رضی اللہ عنہما نے فرمایا: خدا کی قسم! یہی بات تو تمہاری دلیل کو باطل کر دیتی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6082]